Toshkent shahri hokimligi muassisligida davlat va tadbirkorlik subyektlari o‘rtasida “ko‘prik” vazifasini bajaruvchi “Toshkent Invest kompaniyasi” aksiyadorlik jamiyati tashkil etilmoqda. Bu haqda Toshkent shahrini 2030-yilga qadar ijtimoiy-iqtisodiy rivojlantirish chora-tadbirlari to‘g‘risidagi prezident farmonida so‘z boradi.
Kompaniyaning ustav kapitali xalq deputatlari Toshkent shahar Kengashi qarori asosida Toshkent shahri shahar budjetining qo‘shimcha manbalari va qonunchilikda taqiqlanmagan boshqa mablag‘lar hisobidan bosqichma-bosqich 1 trillion so‘m miqdorida shakllantiriladi.
Kompaniya va jamg‘arma mablag‘larini loyihalar va boshqa maqsadlarga yo‘naltirish hamda tijorat banklari va xalqaro moliya institutlaridan qarz mablag‘larini jalb etish Kompaniya kuzatuv kengashi qarori asosida amalga oshiriladi.
“Toshkent Invest kompaniyasi” aksiyadorlik jamiyati faoliyatining asosiy yo‘nalishlari:
- Toshkent shahri va tumanlar hokimliklari hamda ular tarkibidagi korxona va muassasalarga tegishli mulklar holatini tahlil qilish, mavjud resurs va imkoniyatlarni aniqlash va ulardan samarali foydalanish bo‘yicha takliflar ishlab chiqish;
- Munitsipal mulklarni boshqarish, ularning negizida davlat sherigi sifatida davlat-xususiy sheriklik loyihalarini amalga oshirish hamda ularni tadbirkorlik subyektlariga ijara va boshqaruvga berish, ularning monitoringini yuritish va samaradorligini baholab borish;
- Munitsipal mulklarning investitsion jozibadorligini oshirish, ularning negizida investorlar bilan hamkorlikda investitsiya loyihalarini amalga oshirish;
- Tadbirkorlik subyektlarining Toshkent shahri infratuzilmasini rivojlantirish bilan bog‘liq istiqbolli loyihalarini ularning moliyaviy jozibadorligi va samaradorligidan kelib chiqib moliyalashtirishda ishtirok etish;
- Toshkent shahrining alohida hududlarini rivojlantirish va renovatsiya dasturlari, master reja va quriladigan obyektlarning loyiha hujjatlari ishlab chiqilishini tashkil etish;
- Toshkent shahridagi kommunal soha korxonalarining faoliyatini tahlil qilgan holda, ular faoliyatini transformatsiya qilish yuzasidan takliflar ishlab chiqish;
- Toshkent shahridagi qurilish va rekonstruksiya qilish ishlarini hamda infratuzilma tarmoqlariga ulanish jarayonlarini muvofiqlashtirish.
Hujjat bilan yer uchastkalari negizida “Toshkent Invest kompaniyasi” aksiyadorlik jamiyati va tadbirkorlik subyektlari o‘rtasida loyihalarni amalga oshirish mexanizmlari ham tasdiqlangan.
Mazkur mexanizm asosida tadbirkorlik faoliyatini amalga oshirish uchun tanlangan yer uchastkalari yirik investitsiya loyihasini amalga oshirish uchun yer uchastkalarini ajratish tartibida Vazirlar Mahkamasi tomonidan “Toshkent Invest kompaniyasi” aksiyadorlik jamiyatiga 49 yildan oshmaydigan muddatga ijaraga beriladi.
Yer uchastkalari, unda amalga oshiriladigan investitsiya loyihasining master rejasi, loyiha hujjatlari va boshqa ruxsat berish hujjatlari rasmiylashtirilgan holda, Kompaniya buyurtmasiga asosan u bilan birgalikda loyihani amalga oshirishda ishtirok etish huquqi uchun “E-auksion” elektron savdo platformasida auksion savdolariga chiqariladi.
Auksion savdolarida shakllangan narx auksion g‘olibi tomonidan bir yil ichida kompaniya va auksion g‘olibi ishtirokida tashkil etiladigan xo‘jalik jamiyati ustav kapitaliga g‘olibning ulushi sifatida yo‘naltiriladi, bunda ushbu xo‘jalik jamiyatining ustav kapitalida Kompaniyaning 50 foizgacha ulushi tegishli loyiha uchun tanlangan yer uchastkasining auksion savdolarida shakllangan narxi hisobiga shakllantiriladi.
Tashkil etiladigan xo‘jalik jamiyatining ta’sis hujjatlarida kompaniyaning ulushi sotish yoki qurilgan obyektning bir qismini yoki uning qiymatini olish hisobiga begonalashtirilishi mumkin. Bunda, ulush qiymati davlat aktivining auksion savdolarida shakllangan bahosidan kam bo‘lmasligi kerak.
Toshkent shahrini rivojlantirish jamg‘armasi
Kompaniya poytaxt hokimligi huzuridagi Toshkent shahrini rivojlantirish jamg‘armasi tomonidan boshqariladi. Uning asosiy manbalari:
- Jamg‘arma mablag‘lari hisobidan moliyalashtirilgan loyihalardan olingan daromadlar, shu jumladan “Toshkent Invest kompaniyasi” aksiyadorlik jamiyati tomonidan yangidan yaratilgan aktivlarni sotishdan tushgan tushumlar;
- Kompaniya davlat sherigi sifatida ishtirok etgan davlat-hususiy sheriklik loyihalaridan olingan daromadlar;
- Toshkent shahridagi qishloq xo‘jaligiga mo‘ljallanmagan yer uchastkalarini xususiylashtirishdan hamda yer uchastkalarini ijaraga olish huquqini elektron onlayn-auksion orqali sotishdan tushadigan mablag‘larning Vazirlar Mahkamasi tomonidan belgilangan xarajatlar chegirib qolinganidan so‘ng qolgan qismining 70 foizi va yer uchastkasi joylashgan tuman budjetiga yo‘naltiriladigan qismi, bundan maxsus iqtisodiy zonalar, kichik, yoshlar sanoat va tadbirkorlik zonalari hamda “Business city” markazlari hududlaridagi yer uchastkalari mustasno;
- Toshkent shahrida maxsus avtomatlashtirilgan foto va videofiksatsiya texnika vositalari qayd etgan yo‘l harakati qoidalari buzilganligi uchun jarimalarning Toshkent shahri mahalliy budjetiga yo‘naltiriladigan qismining 50 foizi;
- Toshkent shahri uchun ichimlik suv ta’minoti va kanalizatsiya xizmatlari tariflariga belgilangan maxsus ustamaning Toshkent shahri hokimligiga hamda Qurilish va uy-joy kommunal xo‘jaligi vazirligiga yo‘naltirilgan qismi;
- Toshkent shahrida tashqi reklama va axborot obyektini (konstruksiyasini) joylashtirish uchun qonunchilikda belgilangan to‘lovning 20 foizi;
- Toshkent shahrida muhandislik-kommunikatsiya tarmoqlari va transport infratuzilmasini yaratish xarajatlarining bir qismini qoplash maqsadida shaharsozlik faoliyati obyektini qurish yoki rekonstruksiya qilishni loyihalashtirish uchun arxitektura-rejalashtirish topshirig‘ini ishlab chiqish qiymatiga kiritilgan to‘lovning 100 foizi;
- Vaqtincha bo‘sh turgan mablag‘larni tijorat banklari depozitlariga joylashtirish hisobidan olingan daromadlar;
- Toshkent shahrining shahar budjeti daromadlarining prognozdan oshirib bajarilgan qismidan ajratmalar;
- Jismoniy va yuridik shaxslarning homiylik xayriyalari, xalqaro moliya institutlari va xorijiy tashkilotlarning grantlari;
- Qonunchilikda taqiqlanmagan boshqa manbalar.
Jamg‘arma qiymati 200 milliard so‘mdan oshadigan, investorning o‘z mablag‘lari ulushi 25 foizdan kam bo‘lmagan, investitsiya dasturlariga kiritilgan loyihalar, shuningdek, xalqaro va respublika ahamiyatidagi avtomobil yo‘llari bo‘yidagi yaxlit yer maydonlarida tashkil etiladigan yo‘lbo‘yi infratuzilma obyektlarini tashqi muhandislik-kommunikatsiya tarmoqlari bilan ta’minlash bilan ham shug‘ullanadi.
Bundan oldin Toshkent shahrida qo‘shimcha 4 ming gektar yashil hududlar tashkil etilishi to‘g‘risida xabar berilgandi.
Izoh (0)