Ichki ishlar organlari xodimlari kichik yoshdagi bolalarga “oq bilan qorani ajrata olish” haqida maʼruza qilgan Toshkentdagi maktabgacha taʼlim tashkiloti uslubchisi va mudirasi intizomiy jazoga tortildi.
“Gazeta.uz”ning Maktabgacha taʼlim agentligi direktorining birinchi o‘rinbosari Farruh Boboyevga tayanib yozishicha, aslida bolalar bilan mashg‘ulotlar maxsus maydonchada o‘tkazilishi belgilangan. Ammo uchrashuv noto‘g‘ri tashkil etilib, guruhda o‘tkazilgan.
“Maktabgacha taʼlim tashkilotlarida yoz oylarida maktabga tayyorlov guruhlarimizdagi 6 yoshli bolajonlarimizga yo‘l harakati qoidalarini o‘rgatish, harbiylar bilan uchrashish, ona vatanga sadoqat ruhida tarbiyalash maqsadida yozgi sog‘lomlashtirish dasturlari yo‘lga qo‘yilgan. Aynan har bitta bog‘chada yo‘l harakati qoidalarini o‘rgatuvchi maydonchalar mavjud. [Videodagi] uchrashuv aynan o‘sha maydonchada emas, balki guruhda o‘tkazilgan. Uchrashuv noto‘g‘ri tashkil etilgani uchun tegishli mutasaddilar [bog‘cha mudirasi va uslubchisi]ga nisbatan intizomiy choralar qo‘llanildi”, — deydi Farruh Boboyev.
23-iyul, yakshanba kuni internetda poytaxtdagi maktabgacha taʼlim tashkilotlaridan birida ichki ishlar organlari xodimlari 3−4 yoshli bolalar bilan “tarbiyaviy soat” o‘tkazayotgani aks etgan video paydo bo‘ldi. Unda xodimlardan biri yaxshi inson bo‘lish, ota-onani hurmat qilish, keyin afsuslanmaslik uchun “aytganini qilish”, “oq bilan qorani ajrata olish” haqida gapiradi.
Keyinroq ma’lum bo‘lishicha, 17-iyul kuni Uchtepa tumanidagi davlat maktabgacha taʼlim tashkiloti rahbari tomonidan tuman IIO FMB, mudofaa ishlari bo‘limi hamda “Farhod” mahalla fuqarolar yig‘ini raisi nomiga hamkorlikda “Harbiylar bilan uchrashuv” mavzusida profilaktik tadbir o‘tkazish yuzasidan taklifnoma yuborilgan.
Tadbir tafsilotlari aks etgan videoni guruh tarbiyachisi tarbiyalanuvchilar ota-onalarini jamlagan Telegram guruhiga tashlab bergan. “Afsuski, ayrim ota-onalar tomonidan bu video lavha boshqa guruhlarga tashlanib, tomoshabinlar tomonidan noto‘g‘ri talqin qilinganligi achinarlidir”, — deyiladi xabarda.
Shavkat Mirziyoyev 28-iyul kuni IIV kengaytirilgan hay’at yig‘ilishida bog‘cha bolalariga ma’ruza o‘qigan inspektorlarni tanqid qildi.
“Nima ish qilish kerakligini bilmagan ayrim profilaktika inspektorlari esa bog‘chalarga borib, 3-4 yoshli bolakaylarga ‘oq-qorani farqlash’ bo‘yicha ma’ruza o‘qish bilan band. Tizimda staji 3 yilgacha bo‘lgan, endi tajriba to‘playotgan profilaktika inspektorlarini kriminogen og‘ir mahallaga qo‘yish amaliyoti haligacha davom etmoqda. Aksincha, ‘yaxshi’ mahallalarda esa ko‘p yillik tajribasi bor xodimlar xizmat qilmoqda”, — dedi prezident.
Izoh (0)