O‘zbekistondagi maktablarda taʼlim sifati yuqori emas. Sifatni oshirish uchun bir qator mexanizmlar mavjud. Bu haqda maktabgacha va maktab taʼlimi vazirining birinchi o‘rinbosari Usmon Sharifxo‘jayev AOKAdagi matbuot anjumanida aytdi, deya xabar berdi “Daryo” muxbiri.
Foto: “Daryo”
Usmon Sharifxo‘jayevning aytishicha, taʼlim sifati pastligida ota-onalar va ustozlarning aybi bor.
“Taʼlim sifati maktablarda yuqori emas. Buni hammamiz bilamiz. Men sifat past degim kelmayapti, chunki ustozlarimiz xafa bo‘lishadi. Taʼlim sifatini oshirish uchun nima qilish kerak? O‘qituvchilar o‘z ustida ishlab, bilimini oshirib, maktabda bolalarni ko‘proq darsga yo‘naltirish lozim. Maktabda beriladigan bilim bola olishi kerak bo‘lgan bilimning 100 foizi emas. Hech qachon bunday bo‘lmagan, bo‘lmaydi ham. Boshlang‘ich sinflarda ota-ona bola bilan birga dars qiladi, katta sinfda esa u dars qildimi yo‘qmi nazorat qilishmaydi. Repetitor shu yerda qo‘l keladi. Bolani unga yuborishadi va ustida kimdir nazoratchi bo‘ladi. Repetitor – ota-onaning funksionalini almashtiradigan mexanizm. Ota-onalarda ham, ustozlarda ham ayb bor. Bolalarni mustaqil taʼlimga o‘rgatish kerak. Shundangina ular harakat qilib, bilimga ega bo‘ladi”, — dedi vazir o‘rinbosari.
Usmon Sharifxo‘jayev repetitorlar masalasiga ham to‘xtalib o‘tdi.
“Men ham 1990-yillarning oxirida maktabni bitirganman, Toshkent shahridagi repetitorga qatnaganman. Hozir taʼlim sifatiga repetitor aralashuvi ko‘paygan yoki kamaymoqda, buni aniqlaydigan “kriteriya” yo‘q. Oshyapti, deydiganlarning tanishlari repetitorga qatnayotgan bo‘ladi. Oshmayapti, deganlarning xabari bo‘lmagan bo‘lishi mumkin. Hozir yo‘q, kamaygan oxirgi yillarda, desam men xato ham qilishim mumkin. Bu har bir odamning huquqi va qo‘shimcha bilim olish imkoniyati. Agar hozirgi holatda bola maktabda belgilangan dastur bo‘yicha tahsil olsa, o‘qishga kira oladi. Lekin boshqalarga nisbatan ustunlikka ega bo‘lish uchun sportchi ham qo‘shimcha mashg‘ulotlar o‘tkazadi, deb qancha hikoyalar, maqolalar o‘qiganmiz”, — dedi u.
Avvalroq davlat maktablarida bir o‘quvchi uchun yiliga 4,5 million so‘m sarflanayotgani aytilgandi.
Maʼlumot uchun, ayni paytda O‘zbekistonda 10 ming 296 ta maktab va 29 ming 420 ta bog‘cha mavjud bo‘lib, jami 8 million nafarga yaqin o‘quvchi va tarbiyalanuvchilar qamrab olingan. Ularga 700 ming nafar pedagoglar taʼlim va tarbiya berib kelmoqda. Kuzda boshlanadigan yangi o‘quv yili uchun maktablarga jami 732 ming nafar bola qabul qilish rejalashtirilgan.
Izoh (0)