Kilian Mbappe APLga o‘tishga qaror qilsa, u uchun asosiy da’vogar klub nomi ma’lum

“Chelsi” Angliya klublari ichida Kilian Mbappega asosiy da’vogar klub bo‘lib turibdi.

The Telegraph nashrining xabariga ko‘ra, “PSJ” vakillari ingliz klubi bilan muzokara o‘tkazmayotgan bo‘lsa-da, qandaydir aloqalar mavjud.

Agar Kilian APLga o‘tadigan bo‘lsa, aynan “aristokratlar” futbolchi uchun asosiy nomzod bo‘ladi. “Liverpul” Mbappe uchun kurashdan chiqqan.

Hamma gap “Chelsi” “PSJ”ning Mbappe uchun talab qilayotgan narxni to‘lab bera olishida. Undan tashqari futbolchining o‘zi ham APLga o‘tish borasida qaror qabul qilgani yo‘q.

“Chelsi”ning hozirgi bosh murabbiyi Maurisio Pochettino Parij klubida Kilian bilan birga ishlagan. 

Kilianning “PSJ” bilan amaldagi shartnomasi 2024-yil yozda o‘z nihoyasiga yetadi. Futbolchi esa hozircha uni uzaytirishga shoshilgani yo‘q.

Avvalroq, Fransiya prezidenti Emmanuel Makron futbolchini “PSJ”da qolishga ko‘ndirishga urinib ko‘rmoqchiligi xabar qilingandi.

Mbappe o‘tgan mavsum “PSJ” safida Fransiya chempionligini qo‘lga kiritdi va 29 ta gol bilan turnir to‘purariga aylandi.