“Barselona” UEFAga “PSJ” ustidan shikoyat qiladi

“Barselona” Usmon Dembele jamoani tark etsa, “PSJ”ga qarshi urush e’lon qilishga tayyor.

Agar parijliklar vingerning 50 million tovon pulini (1-avgustdan tovon puli ikki karra oshadi) to‘lamoqchi bo‘lsa, “Barselona” UEFAga murojaat qilmoqchi. Klub “PSJ”ning moliyaviy feyr-pley qoidalarini buzayotgan bo‘lishi mumkinligidan shubhalanmoqda. “Barselona” UEFAdan Parij klubi pulni qayerdan olayotganini aniqlashtirishini so‘raydi, deb xabar bermoqda Mundo Deportivo.

Qayd etib o‘tish joiz, parijliklarning Dembele bilan muzokaralarga ruxsat berishni so‘rab yozgan xatiga “Barselona” qat’iy tarzda futbolchining sotilmasligini ma’lum qilgan. 

“Barselona” klubi prezidenti Xoan Laporta va direktor Mateu Alemani shanba kuni favqulotda yig‘ilish o‘tkazgan va Usmonga u Xavi rejasining muhim qismiligini tushuntirgan. Yakshanba kuni bosh murabbiyning o‘zi Dembele bilan suhbatlashib, uni jamoaning asosiy futbolchilaridan biri ekanligiga ishontirishga uringan. 

“Barselona”ning bu urinishlariga javoban “PSJ” futbolchi bilan shaxsiy shartnomadagi maoshni ikki baravarga oshirgan. Qaror qabul qilish esa futbolchining o‘zida qolgan. 

26 yoshli o‘ng qanot vingeri o‘tgan mavsum 35 ta o‘yinda maydonga tushib, 8 ta gol va 9 ta golli uzatmani amalga oshirgan.