Buyuk Britaniya “Vagner” xususiy harbiy kompaniyasini terrorchi tashkilot sifatida qora ro‘yxatga kiritish rejasini to‘xtatdi. Bunga iyun oyida Yevgeniy Prigojin ko‘targan isyon va Rossiya prezidenti Vladimir Putinning guruh Rossiya davlatiga bevosita aloqador ekani haqidagi bayonotlari sabab bo‘ldi, deb yozmoqda Britaniyaning The Times gazetasi.
“Vagner”ni qora ro‘yxatga qo‘shishning huquqiy asoslari boshidan qiyin edi, chunki guruh “harbiy tuzilma” sifatida harakat qilgan, ammo Prigojinning “amnistiyasi”dan keyin vaziyat yanada murakkablashdi, deb yozadi gazeta.
Putin 27-iyun kuni Mudofaa vazirligi harbiy xizmatchilari bilan uchrashuvda Rossiya davlati “Vagner”ning mavjudligini saqlab turishni to‘liq ta’minlaganini tan oldi, vaholanki, ilgari rasmiylar guruhni moliyalashtirishga aloqadorligini bir necha bor rad etgan.
Putinning so‘zlariga ko‘ra, 2022-yilning mayidan 2023-yilning mayigacha “Vagner” aʼzolarini ushlab turish va rag‘batlantirish uchun budjetdan 86 milliard rubl, sug‘urta to‘lovlari uchun yana 110 milliard rubl ajratilgan.
Shu bilan birga, guruh egasi — “Konkord” kompaniyasi armiyani oziq-ovqat mahsulotlari bilan ta’minlash uchun davlatdan 80 milliard rubl oldi, deydi Putin
The Times nashrining Britaniya hukumatidagi manbalariga ko‘ra, kompaniyaning qora ro‘yxatga kiritilishi Rossiya hukumati idoralaridan birining faoliyatini taqiqlashga tengdir, bu esa “juda noodatiy hamda qator diplomatik va huquqiy asoratlarga boy bo‘ladi”.
Shu bilan birga, Britaniya ichki ishlar vaziri Suella Braverman va xavfsizlik bo‘yicha davlat kotibi Tom Tugendxat “Vagner” guruhini terrorchi tashkilot deb e’lon qilish yo‘lini qidirishda davom etmoqchi, deb yozadi gazeta.
Bunday chora Britaniya fuqarolariga guruhga aloqador yig‘inlarda qatnashishni, uni qo‘llab-quvvatlashga chaqirishni, uning ramzlarini omma oldida namoyish qilishni taqiqlaydi, bu esa “Vagner”ni ISHID va “Al-Qoida” singari terroristik guruhlar bilan bir qatorga qo‘yadi.
Bundan tashqari, moliyaviy sanksiyalar joriy etiladi, “vagnerchi”lar Britaniya sudlari xizmatlaridan foydalana olmaydi, shuningdek, Britaniya moliya institutlari orqali boylik to‘play olmaydi, deb yozadi gazeta.
Izoh (0)