Таллин полицияси 30 июлга ўтар кечаси Россия элчихонаси биносига тухум улоқтирган қоидабузарни ҳибсга олди, деб ёзмоқда Delfi.
Эстония полицияси матбуот хизмати қўлга олинган шахс 1977 йилда туғилган эркак эканини маълум қилди. Унга нисбатан иш қўзғатилган. Ҳуқуқ-тартибот идоралари бошқа тафсилотларни ошкор қилмаган.
Шу билан бирга, “Тинч қаршилик кўрсатиш” ташкилоти фаоли Михаил Баранов Таллинда ҳибсга олинган одам журналист Аркадий Бабченко эканини айтди.
Бабченконинг ўзи ижтимоий тармоқларда полиция машинасидан тушган суратини жойлади. Facebook’даги изоҳларида у ҳақиқатан ҳам Россия элчихонасига тухум улоқтирганини тасдиқлади.
“Московский комсомолец” ва “Новая газета” газеталарида ҳарбий мухбир бўлиб ишлаган Аркадий Бабченко 2017 йилдан бери Россиядан ташқарида яшайди ва Россия ҳукуматини кескин танқид қилиб келади. 2018 йилнинг июнь ойида журналист Украинада яшаётганида унинг ўлдирилгани ҳақида хабар тарқалди. Бир кун ўтгач, қотиллик саҳналаштирилган экани ва Бабченконинг тириклиги маълум бўлди. Украина хавфсизлик хизмати Россия махсус хизматлари Бабченкога суиқасд уюштиришга тайёргарлик кўраётгани, томоша эса уларнинг режаларини ошкор қилиш учун зарур бўлганини таъкидлади.
2020 йилдан бери Бабченко “Росфинмониторинг” террорчилари ва экстремистлари рўйхатига киритилган. 2023 йил январь ойида Россия Ички ишлар вазирлиги уни қидирувга берди, апрель ойида Россия Адлия вазирлиги журналистни “хорижий агентлар” реестрига киритди.
Изоҳ (0)