“Novaya gazeta” jurnalisti Yelena Milashina va advokat Aleksandr Nemov Chechenistonda hujumga uchradi. Milashina va Nemov o‘tirgan mashina aeroportdan Grozniyga ketayotgan vaqtda niqobli odamlar ularning yo‘lini to‘sgan, deb yozadi “Novaya gazeta”. Milashina va Nemov qattiq kaltaklangan, ularning texnika va hujjatlari yo‘q qilingan.
“Memorial” xabariga ko‘ra, jurnalist va advokatni tepkilashgan, yuziga urishgan, boshiga qurol o‘qtalib, o‘lim bilan qo‘rqitishgan. Ularni kaltaklash davomida bosqinchilar “Sizlarni ogohlantirdik. Bu yerdan ketinglar, hech narsa yozmanglar” deyishgan.
Nemov gapirish va harakatlanishga qiynalmoqda, Milashinaning barmoqlari singan, vaqti-vaqti bilan hushini yo‘qotyapti, deyiladi huquqni muhofaza qilish tashkiloti bayonotida. Ular kasalxonaga yetkazilgan, nogironlar aravachasida harakatlanmoqda.
Milashina o‘tgan yilning fevral oyida Checheniston rasmiylaridan tahdidlar olganini, shu sababli Rossiyani vaqtincha tark etganini aytgandi. Checheniston rahbari Ramzan Qodirov jurnalistni “Checheniston va chechenlar mavzusida pul topayotgan terrorchi” deb atagan.
Bu safar advokat va jurnalist Grozniyga chechenistonlik muxolifatchilarning onasi ustidan sud hukmi o‘qilishida qatnashgani kelgan edi.
Izoh (0)