Toshkent shahri Mirzo Ulug‘bek tumanida 32 yoshli ayol liftda qamalib, vafot etgani xabar qilingandi. Bosh prokuratura holat yuzasidan ma‘lumot berdi.
Unga ko‘ra, 24-iyul kuni soat taxminan 14-50 larda 32 yoshli ayol yuqorida ko‘rsatilgan manzildagi ko‘p qavatli uyning liftiga kirib, qayta chiqmagan. 26-iyul kuni marhumaning yaqin qarindoshlari tomonidan ichki ishlar idorasiga bedarak yo‘qolganligi yuzasidan xabar berilgan.
Tekshirish davomida ushbu lift bir necha kundan buyon ishlamayotganligi, oldin ham ishlamay qolishi holatlari ko‘p marotaba bo‘lganligi haqida uy yashovchilari tomonidan tushuntirishlar berilgan. Shifokorlarning dastlabki tibbiy maʼlumotnomasiga ko‘ra, marhumaning o‘limiga yurakning ishemik kasaligi, o‘tkir yurak, qon-tomir va nafas yetishmovchiligi sabab deb ko‘rsatilgan.
“Jamoatchilikda ushbu voqea bo‘yicha bildirilayotgan taxminlar tergovga qadar tekshiruv davomida mutaxassislar yordamida to‘liq tekshirilib, qonuniy qaror qabul qilinishi taʼminlanadi”, — deyiladi xabarda.
“Daryo” muxbiri holat yuz bergan ko‘p qavatli uyga borib, reportaj tayyorladi. Ijtimoiy tarmoqlarda tarqalgan xabarlarda odam o‘limi bilan yakunlangan ushbu ko‘ngilsizlikka elektr energiyasi ta’minotidagi doimiy uzilishlar sabab qilib ko‘rsatilgandi. Hududda xizmat olib borayotgan mas’ullarning aytishicha esa, marhuma liftga qamalib qolgan 23—24-iyul kunlari ko‘p qavatli uyda chiroq o‘chmagan.
Shu yerdagi aholi hamda mas’ullarning qo‘shimcha qilishicha, ayol xizmat yuzasidan lift orqali 8-qavatga ko‘tarilish chog‘ida nosozlik yuzaga kelgan. Marhuma taxminan 4 kun davomida lift ichida qamalib qolgan. 27-iyul kuni esa uning jasadi topilgan.
Izoh (0)