Тошкент шаҳри Мирзо Улуғбек туманида 32 ёшли аёл лифтда қамалиб, вафот этгани хабар қилинганди. Бош прокуратура ҳолат юзасидан маълумот берди.
Унга кўра, 24 июль куни соат тахминан 14-50 ларда 32 ёшли аёл юқорида кўрсатилган манзилдаги кўп қаватли уйнинг лифтига кириб, қайта чиқмаган. 26 июль куни марҳуманинг яқин қариндошлари томонидан ички ишлар идорасига бедарак йўқолганлиги юзасидан хабар берилган.
Текшириш давомида ушбу лифт бир неча кундан буён ишламаётганлиги, олдин ҳам ишламай қолиши ҳолатлари кўп маротаба бўлганлиги ҳақида уй яшовчилари томонидан тушунтиришлар берилган. Шифокорларнинг дастлабки тиббий маълумотномасига кўра, марҳуманинг ўлимига юракнинг ишемик касалиги, ўткир юрак, қон-томир ва нафас етишмовчилиги сабаб деб кўрсатилган.
“Жамоатчиликда ушбу воқеа бўйича билдирилаётган тахминлар терговга қадар текширув давомида мутахассислар ёрдамида тўлиқ текширилиб, қонуний қарор қабул қилиниши таъминланади”, — дейилади хабарда.
“Дарё” мухбири ҳолат юз берган кўп қаватли уйга бориб, репортаж тайёрлади. Ижтимоий тармоқларда тарқалган хабарларда одам ўлими билан якунланган ушбу кўнгилсизликка электр энергияси таъминотидаги доимий узилишлар сабаб қилиб кўрсатилганди. Ҳудудда хизмат олиб бораётган масъулларнинг айтишича эса, марҳума лифтга қамалиб қолган 23—24 июль кунлари кўп қаватли уйда чироқ ўчмаган.
Шу ердаги аҳоли ҳамда масъулларнинг қўшимча қилишича, аёл хизмат юзасидан лифт орқали 8-қаватга кўтарилиш чоғида носозлик юзага келган. Марҳума тахминан 4 кун давомида лифт ичида қамалиб қолган. 27 июль куни эса унинг жасади топилган.
Изоҳ (0)