“Лойиҳа ҳужжатлари вазирлик билан келишилмаган, рад этилган” —экология вазирлиги Сурхондарё ва Бухорода йўл қуриш учун ўн минглаб дарахтларни кўчириш юзасидан изоҳ берди 

Сурхондарё ва Бухоро вилоятларида йўл қуриш белгиланган бўлиб, режага мувофиқ, Бухорода 31 минг 371 туп, Сурхондарёда эса 21 минг 803 туп дарахтни кўчириш тўғрисидаги ҳукумат қарори лойиҳасига Экология вазирлиги хулоса бериши топширилган. Ушбу ҳолат жамоатчилик эътирозларига сабаб бўлиб, тармоқларда кенг муҳокама қилинмоқда.

Юқоридаги масала юзасидан 27 июль куни Экология вазирлиги томонидан АОКАда ўтказилган матбуот анжуманида вазирнинг биринчи ўринбосари Обиджон Қудратов журналистларга изоҳ берди.

“Бу ҳали лойиҳа жараёнида. Лойиҳа ҳужжатлари вазирлик билан келишилмаган, рад этилган. Йўл бўйида кесилиши мумкин бўлган дарахтларни асраб қолиш бўйича тегишли инстанцияларга қўшимча равишда хатлар билан мурожаат қилдик.

Бундан ташқари, жамоатчилик эшитувини ташкил қилиб, улар розилик билдиргандан кейингина қарор қабул қилиш тўғрисида Вазирлар Маҳкамаси билан келишиб олганмиз. Албатта, Сурхондарё ва Бухоро вилоятларида жамоатчилик эшитуви ўтказилади.

Дарахтларни асраб қолиш бўйича, биринчи навбатда, ўзимиз ўша жойга бориб, дарахтларни ҳимоя қилиш чораларини кўрамиз”, — деди Обиджон Қудратов.

Иқтисодчи блогер Отабек Бакиров ўн минглаб дарахтларни кўчириб ўтказиш бўйича қарор лойиҳасига эътирозларини билдирган.

“Ўзбекистонда дарахт кўчириш бу дарахт кесишнинг чиройли ниқобланган варианти ҳисобланади. Ҳамма ўзбек чиновниклари тупуриб қўйган мораторийнинг айланиб ўтишнинг энг кўп тарқалган кўриниши”, — деган Отабек Бакиров ўз постида.

Мавзуга доир:

• Ўзбекистонда дарахт кесиш билан боғлиқ 3,6 млрд сўмлик ҳуқуқбузарликлар аниқланди
• Ўзбекистонда 6 ойда дарахтлар ноқонуний кесилишидан табиатга қанча зарар етказилгани маълум қилинд
• Бош прокуратура 2 млн кўчат “экилди” дея қўшиб ёзилгани айтилган ҳолатни алоҳида назоратга олди