Britaniyada o‘qituvchilar ish tashlash e’lon qilib, fakultet imtihonlari va dissertatsiyalarga baho qo‘yishdan bosh tortmoqda. Masalan, Kembrij talabalari keyingi o‘quv yili boshlangunga qadar yakuniy baholarini olmasliklari haqida ogohlantirilgan.
Shuningdek, Edinburg universiteti talabalariga universitetlar va kollejlar ittifoqining ish tashlash haqidagi qarori tufayli dissertatsiya natijalari kechikishi mumkinligi haqida xabar berilgan.
Bukingem universiteti qoshidagi Ta’lim va bandlikni tadqiq qilish markazi direktori Alan Smitersning aytishicha, akademiklar tomonidan talabalarning o‘z faoliyatini davom ettirishiga to‘sqinlik qilish “mas’uliyatsizlikdir”.
“Bu talabalar uchun juda og‘ir va adolatsiz qaror. Universitetlar vaziyatni hal qilishning yaxshiroq yo‘lini topa olmagani achinarli holat”, — deya qo‘shimcha qildi u.
Kembrij talabalarining Varsity gazetasi xabar qilishicha, agar nizo ijobiy hal etilmasa, siyosat, xalqaro tadqiqotlar va sotsiologiya fanlari bo‘yicha yakuniy baholar 30-sentabrdan keyin qo‘yilishi haqida talabalar ogohlantirilgan.
Bitiruvchilarni ishga olish bo‘yicha maslahatchi bo‘lgan Graduate Recruitment Bureau asoschilaridan biri Den Xouzning aytishicha, talabalar “arosat”da qolib ketishi xavfi bor. Kasaba uyushmasi boykot tufayli 500 mingdan ortiq talaba o‘qishni bitira olmayotgani haqida ma’lum qilgan.
Ish tashlashlar joriy yilning 20-aprel kuni 145 ta universitetda xodimlarning maoshi va mehnat sharoitlaridan noroziligi sababli boshlangan. Boykot ish beruvchilar o‘qituvchilar uchun yaxshilangan taklif kiritmaguncha davom etishi ma’lum qilingan.
Izoh (0)