Dunyodagi eng katta kruiz kemasi Icon of the Seas kelasi yilning yanvarida safarga otlanadi, deb xabar berdi Forbes.
Yo‘lovchi layneri Royal Caribbean International kompaniyasiga tegishli. Uning uzunligi 365 metrga yetadi, og‘irligi 250 ming tonnadan oshadi va bortda 5 610 yo‘lovchi hamda 2 350 nafar xizmatchini sig‘dira oladi. Ulkan laynerning diqqatga sazovor xususiyati shundaki, u afsonaviy “Titanik”dan 5 baravar og‘irroq.
Icon of the Seas qurilishidan oldin xuddi shu Royal Caribbean kompaniyasining Wonder of the Seas kemasi dengizdagi eng katta kruiz hisoblangan. Xususiyatlarni solishtirsak, Icon avvalgisidan deyarli 15 tonna og‘irroq va 3 metr uzunroq ekanini farqlash mumkin. Qayd etilishicha, yangi kema ekologik toza suyultirilgan tabiiy gazda harakatlanadi. Kema qurilishi 2021-yilda boshlangan bo‘lib, uni 26-oktabrda suvga tushirish rejalashtirilgan.
Rekordni yangilagan layner yo‘lovchilari, shubhasiz, bortda zerikmaydi: ularga 40 dan ortiq ko‘ngilochar mashg‘ulotlar taklif etiladi. Gigant kemaning asosiy “xususiyati” shundaki, unda basseynlar va jakuzilardan iborat ulkan dengiz akvaparki bor. Bundan tashqari, kemada ochiq osmon ostidagi jonli o‘simliklar devorlari, 16 metrli sharshara, “sovuq orol” va “hissiyotlar oroli”ni o‘z ichiga olgan besh qavatli “Markaziy bog‘” qurilgan. Yo‘lovchilarga qulaylik yaratish maqsadida 22 ta lift, kinoteatr, savdo va ko‘ngilochar markazi, kazino, fitnes markazi, mini-golf maydonchalari, tepalikka tirmashib chiqish devorlari qurilgan.
Kemaga chiqish uchun eng arzon chipta narxi 1,5 ming dollar bo‘lib, ular dastlabki kunlardanoq tugagan, hozirda kemada narxi 10 800 dollar bo‘lgan bir nechta premium joylar mavjud.
Laynerda Mayamidan Karib dengizining sharqiy va g‘arbiy qismlariga suzib borish mumkin bo‘ladi. 7 kunlik marshrut shaxsiy orolga tashrifni ham o‘z ichiga oladi.
Izoh (0)