Guruchning jahon va O‘zbekiston bozoridagi narxi maʼlum qilindi

Qishloq xo‘jaligi axborot xizmati guruchning jahondagi va O‘zbekiston bozoridagi narxlari haqida “Daryo”ga maʼlumot berdi.

Aytilishicha, jahon bozorida joriy yilning iyun oyi holatiga ko‘ra, o‘rtacha guruch narxi 1,93 dollar (22 ming 364 so‘m), eng arzon narx esa Tunisda 0,52 dollar (6 ming 25 so‘m), maksimal narx Serbiyada 4,84 dollar (56 ming 86 so‘m).

“Bugungi kunda O‘zbekiston dehqon bozorlarida guruchning 1 kilogramm narxi navidan kelib chiqib, 11 ming 500 so‘mdan 25 ming so‘mgacha sotilmoqda. Bu o‘tgan yilning mos davriga nisbatan 35,2 foizga qimmatlaganini ko‘rsatadi.

Jumladan, guruchning “Avangard” navi 11 ming 500—17 ming 500 so‘mgacha, “Alanga” navi 16 ming—18 ming 500 so‘mgacha, “Lazer” navli guruch esa 19 ming 500—25 ming so‘mgacha sotilmoqda.

Kuzatuv natijalariga ko‘ra, guruchning minimal narxi Nukus shahrining “Nukus dehqon bozori” va Guliston shahrining “Guliston dehqon bozori”da (“Nukus-2” va boshqa mahalliy navli guruchlar) 11 ming 500 so‘m qayd etilgan. Maksimal narx esa Toshkent shahrining “Farhod dehqon bozori”da 25 ming so‘mdan sotilmoqda (“Lazer” navli guruch). Shu bilan birga, ushbu bozorda guruchning minimal narxi 13 ming so‘mni tashkil etgan.

Barcha bozorlar guruch bilan uzluksiz taʼminlangan hamda zaxiralar yetarli”, — deyiladi vazirlik axborotida.

Maʼlumot uchun, Respublika hududlarida 2022-yilda 106 ming gektar maydonlarda sholi ekilib, 517 ming tonna sholi yetishtirildi. Guruch hisobida 310 ming tonnani tashkil etadi. Yaʼni, aholi talabiga nisbatan 43 ming tonna kam guruch ishlab chiqariladi (2021-yilga nisbatan 48 ming tonna ko‘p sholi yetishtirilgan). Tahlillarga ko‘ra, 2022-yilda respublika bo‘yicha 8 ming tonna guruch import qilingan bo‘lsa, 2023-yilda 53,5 ming tonna guruch importi amalga oshirilgan. Yaʼni isteʼmolga nisbatan 10 ming tonna ortiqcha guruch import qilingan.

Avvalroq Qishloq xo‘jaligi vazirligi Hindiston don mahsulotlari narxining keskin oshishiga yo‘l qo‘ymaslik uchun O‘zbekiston va boshqa mamlakatlarga guruch eksportini taqiqlagani mamlakat guruch bozoriga qay darajada taʼsir qilishi yuzasidan izoh bergan edi.