Jizzaxda budjet mablag‘larini o‘zlashtirib kelgan ona-bola maktab direktorlariga nisbatan jinoyat ishi qo‘zg‘atildi, deb xabar bermoqda Korrupsiyaga qarshi kurashish agentligi matbuot xizmati.
Ma’lum qilinishicha, Jizzax viloyati Paxtakor tumanidagi 14-sonli bolalar musiqa va sanʼat maktabi direktori V.M.O. o‘z xizmat mavqeyidan foydalangan holda aslida maktabda ishlamagan turmush o‘rtog‘i O.A.ga ovoz berish operatori sifatida 2019—2023-yil 1-mayga qadar 47,3 million so‘m, shuningdek, 2014-yilda ishdan bo‘shagan D.H.ga esa 2016-yilga qadar 22,9 million so‘m ish haqi va unga tenglashtirilgan to‘lovlarni noqonuniy to‘lab kelgan.
Bundan tashqari, V.M.O. Zafarobod tumanidagi 9-sonli bolalar musiqa va sanʼat maktabida direktor vazifasida ishlab kelayotgan o‘g‘li R.D. bilan jinoiy til biriktirib, budjet mablag‘larini talon-toroj qilgan.
U o‘z rahbarligidagi maktab xodimlari N.Yu. va I.T.ning xabardorligisiz ularga bir vaqtning o‘zida o‘g‘li rahbarligidagi maktabda ishlagani to‘g‘risida soxta hujjatlar rasmiylashtirgan. 2017—2022-yillar davomida ushbu ikki xodimga majburiy ushlanmalardan tashqari jami 69,8 million so‘m ish haqi va unga tenglashtirilgan to‘lovlarni noqonuniy to‘lab, umumiy hisobda 146,9 million so‘mlik budjet mablag‘larini o‘zlashtirish va rastrata qilish yo‘li bilan talon-toroj qilgan.
O‘rganish natijasi bo‘yicha to‘plangan hujjatlar 2023-yilning aprelida Bosh prokuraturaga yuborilgan.
Bosh prokuratura huzuridagi Iqtisodiy jinoyatlarga qarshi kurashish Departamentining Jizzax viloyati Paxtakor tumani bo‘limi tomonidan 16-iyun kuni Paxtakor tumanidagi 14-sonli bolalar musiqa va sanʼat maktabi mansabdor shaxslari va boshqalarga nisbatan Jinoyat kodeksining 167-moddasi (o‘zlashtirish yoki rastrata yo‘li bilan talon-toroj qilish) 2-qismi “a,” “b”, “g” bandlari va 209-moddasi (mansab soxtakorligi) 1-qismi bilan jinoyat ishi qo‘zg‘atilgan.
Hozirda tuman prokuraturasi tomonidan tergov harakatlari olib borilmoqda.
Izoh (0)