Hindiston don mahsulotlari narxining keskin oshishiga yo‘l qo‘ymaslik uchun O‘zbekiston va boshqa mamlakatlarga guruch eksportini taqiqlagan edi. Mazkur holat O‘zbekistondagi guruch bozoriga qay darajada taʼsir qilishi xususida Qishloq xo‘jaligi vazirligi axborot xizmati rahbari Dilshod Nazirov “Daryo”ga izoh berdi.
Maʼlum qilinishicha, O‘zbekistonda har yili 100 ming gektardan ortiq maydonlarda sholi ekib, yetishtiriladi. Respublika sharoitida aholi jon boshiga o‘rtacha yiliga 9,8 kilogramdan guruch isteʼmoli talab etiladi. Yaʼni respublika aholisini guruch mahsulotlari bilan to‘liq taʼminlash uchun 353 ming tonna guruch zaxirasi zarur.
“Qozog‘istondan 29,3 ming tonna (54,7 foiz), Pokistondan 23,2 ming tonna (43,3 foiz), Tailanddan 599 tonna (1,1 foiz), Turkiyadan 265 tonna (0,5 foiz) va Hindistondan 126 tonna (0,2 foiz) va boshqa mamlakatlardan 21,1 tonna (0,02 foiz) guruch importi amalga oshirilgan.
Yuqoridagilarni inobatga olsak, so‘nggi 5 yilda Hindistondan respublikamizga jami 232,6 tonna guruch importi amalga oshirilgan, xolos. Joriy yilda Hindistonning boshqa mamlakatlarga guruch eksportini to‘xtatishi O‘zbekistonga o‘z taʼsirini ko‘rsatmaydi”, — deyiladi vazirlik axborotida.
Maʼlumot uchun, Hindiston guruch eksporti dunyoda 1-o‘rinda bo‘lib, umumiy jahon eksportining 36,8 foizini tashkil qiladi, asosiy eksport Afrika davlatlari (7,1 million tonna), Xitoy (2,1 million tonna), Eron (1,2 million tonna), Saudiya Arabistoni (1 million tonna) va boshqa davlatlarga qilinadi.
Izoh (0)