Қишлоқ хўжалиги ахборот хизмати гуручнинг жаҳондаги ва Ўзбекистон бозоридаги нархлари ҳақида “Дарё”га маълумот берди.
Айтилишича, жаҳон бозорида жорий йилнинг июнь ойи ҳолатига кўра, ўртача гуруч нархи 1,93 доллар (22 минг 364 сўм), энг арзон нарх эса Тунисда 0,52 доллар (6 минг 25 сўм), максимал нарх Сербияда 4,84 доллар (56 минг 86 сўм).
“Бугунги кунда Ўзбекистон деҳқон бозорларида гуручнинг 1 килограмм нархи навидан келиб чиқиб, 11 минг 500 сўмдан 25 минг сўмгача сотилмоқда. Бу ўтган йилнинг мос даврига нисбатан 35,2 фоизга қимматлаганини кўрсатади.
Жумладан, гуручнинг “Avangard” нави 11 минг 500—17 минг 500 сўмгача, “Аланга” нави 16 минг—18 минг 500 сўмгача, “Лазер” навли гуруч эса 19 минг 500—25 минг сўмгача сотилмоқда.
Кузатув натижаларига кўра, гуручнинг минимал нархи Нукус шаҳрининг “Нукус деҳқон бозори” ва Гулистон шаҳрининг “Гулистон деҳқон бозори”да (“Нукус-2” ва бошқа маҳаллий навли гуручлар) 11 минг 500 сўм қайд этилган. Максимал нарх эса Тошкент шаҳрининг “Фарҳод деҳқон бозори”да 25 минг сўмдан сотилмоқда (“Лазер” навли гуруч). Шу билан бирга, ушбу бозорда гуручнинг минимал нархи 13 минг сўмни ташкил этган.
Барча бозорлар гуруч билан узлуксиз таъминланган ҳамда захиралар етарли”, — дейилади вазирлик ахборотида.
Маълумот учун, Республика ҳудудларида 2022 йилда 106 минг гектар майдонларда шоли экилиб, 517 минг тонна шоли етиштирилди. Гуруч ҳисобида 310 минг тоннани ташкил этади. Яъни, аҳоли талабига нисбатан 43 минг тонна кам гуруч ишлаб чиқарилади (2021 йилга нисбатан 48 минг тонна кўп шоли етиштирилган). Таҳлилларга кўра, 2022 йилда республика бўйича 8 минг тонна гуруч импорт қилинган бўлса, 2023 йилда 53,5 минг тонна гуруч импорти амалга оширилган. Яъни истеъмолга нисбатан 10 минг тонна ортиқча гуруч импорт қилинган.
Аввалроқ Қишлоқ хўжалиги вазирлиги Ҳиндистон дон маҳсулотлари нархининг кескин ошишига йўл қўймаслик учун Ўзбекистон ва бошқа мамлакатларга гуруч экспортини тақиқлагани мамлакат гуруч бозорига қай даражада таъсир қилиши юзасидан изоҳ берган эди.
Изоҳ (0)