DXX Samarqand viloyati boshqarmasi hamda Iqtisodiy jinoyatlarga qarshi kurashish departamenti viloyat boshqarmasi xodimlari hamkorligida o‘tkazilgan tezkor tadbirda fuqarolarni AQSHga noqonuniy yuborish holatiga chek qo‘yildi.
Ma’lum qilinishicha, Samarqand tumanida yashovchi 36 yoshli N.F. mahalliy fuqaroni 16 ming AQSH dollari evaziga Toshkent—Istanbul—Madrid—Meksika—AQSH yo‘nalishi orqali AQSHga noqonuniy o‘tkazib qo‘yishni va‘da qilib, so‘ralgan puldan 10 ming dollarni olayotgan vaqtda qo‘lga olingan.
Ushbu yo‘nalishdagi yana bir shunday tadbirda Samarqand tumanida yashovchi fuqaro 62 yoshli R.M. mahalliy fuqaroni Toshkent—Tel-Aviv yo‘nalishi orqali Isroilga jo‘natib, u yerda ishga joylashtirish evaziga 18 ming dollar talab qilib, 12 ming dollarni olayotgan vaqtida qo‘lga olingan.
Hozirda ushbu shaxslarga nisbatan Jinoyat kodeksining tegishli moddalari bilan jinoyat ishi qo‘zg‘atilib, tergov harakatlari olib borilmoqda.
AQSHga yuborish holatlari
Mart boshlarida Samarqand shahrida 64 nafar fuqaroni AQSHga yuborishini aytib, ularning 4 milliard so‘mini o‘zlashtirganlarga sud hukmi o‘qilgandi. Shuningdek, Samarqandda Meksika orqali AQSHga yuborishini aytib, fuqarodan 50 ming dollar so‘ragan shaxs ushlangani, Samarqandda fuqaroni 30 ming dollarga AQSHga yubormoqchi bo‘lgan haydovchi qo‘lga olingani, Navoiyda fuqaroni AQSHga ishga yuborishini aytib, 800 dollar olgan shaxs ushlangani to‘g‘risida xabar berilgandi.
Izoh (0)