Prezident maktablariga kirish imtihonlarining birinchi bosqich natijalari e’lon qilindi

Ixtisoslashtirilgan ta’lim muassasalari agentligi prezident maktablariga kirish imtihonlarining birinchi bosqich natijalarini e’lon qildi.

Test natijalarini kompyuter ishlatgan holda ushbu havola orqali ko‘rish mumkin.

Saralash imtihon natijalarini qidirish tartibi

• Talabgor topshirgan hududi bo‘yicha belgilangan *.pdf faylni ochiladi; 
• Nomzodning natijasini bilish uchun qidirish tugmasini bosib (Ctrl+F), sizga taqdim etilgan maxsus ID raqami teriladi va Enter tugmasi bosiladi;
• Saralash bosqichi imtihonlariga o‘tgan nomzodlar – jadvalning yuqori qismida ko‘k rangda belgilangan bo‘ladi;
• Saralash bosqichi imtihonlariga o‘ta olmagan nomzodlar esa – oq rang bilan belgilangan bo‘ladi.

Prezident maktablariga kirish imtihonlari natijalarini tekshirish va talabgorlarning javoblari natijalarini baholash ta’lim sohasida faoliyat yurituvchi xorijiy tashkilot — Cambridge Assessment International Education tomonidan amalga oshiriladi. 

Saralash natijalari anonim tarzda e’lon qilinadi. Nomzodning shaxsiy ma’lumotlari ko‘rsatilmaydi. 

Asosiy imtihonlar 2023-yil 31-iyul kuni o‘tkazilishi rejalashtirilgan. Yakuniy bosqichga saralash bosqich imtihonida qatnashgan nomzoddan 6720 nafari, ya’ni qabul kvotasida belgilangan har bir o‘ringa 20 kishi hisobidan talabgorlar yo‘llanma oladi.

Shuningdek, saralash natijalarni ushbu havola orqali ham tekshirish mumkin.

Eslatib o‘tamiz, 15-iyul kuni bo‘lib o‘tgan prezident maktablariga kirish imtihonlarining birinchi bosqichida 1-smenada tushgan savollarning 2-smenada ham takrorlangani haqida xabarlar tarqaldi. Ixtisoslashtirilgan ta’lim muassasalari agentligi buni rad etib chiqdi. “Bir smenada berilgan savollar keyingi smenalarda aynan qo‘llanmaydi”, — deyiladi munosabatda.

Ixtisoslashtirilgan maktablar haqida

2022-yil 14-aprel kuni prezidentning “Prezident ta’lim muassasalari agentligi tizimidagi ixtisoslashtirilgan maktablar tarmog‘ini kengaytirish to‘g‘risida”gi farmoni imzolangan. Unga ko‘ra, 2023-yil 1-iyunga qadar faoliyati tugatilgan mehribonlik uylari va bolalar shaharchalari negizida 5 ta ixtisoslashtirilgan maktab-internati hamda 3 ta ixtisoslashtirilgan maktab; 2022—2024-yillarda Prezident ta’lim muassasalar agentligi tizimida 25 ta ixtisoslashtirilgan maktab-internatlari qurish hamda kelgusida yangi ixtisoslashtirilgan maktab-internatlar va ixtisoslashtirilgan maktablarni faqat agentlik tizimida tashkil etish kabi vazifalar belgilab berilgan.