Aktyor Yigitali Mamajonov va Muqaddas Sa’dullayevaning oilasi 7-8 oy avval ajrim yoqasida edi. Aktrisa Instagram’dagi sahifasidan turmush o‘rtog‘i bilan tushgan suratlarini o‘chirib tashlagan, ular ijtimoiy tarmoqda bir-birini kuzatishni to‘xtatgan edi. Yigitali oilasidagi notinchlikka nima sabab bo‘lgani haqida “Mehmonda” YouTube kanaliga bergan intervyusida so‘zlab berdi.
“O‘zbek qizi” filmida Aysanemxon Yusupova bilan sevishgan juftlikni ijro etgani haqida
— Har bir aktyorning o‘ziga yarasha metodikasi bor. U o‘zi uchun muayyan holatga kirish uchun yo‘nalish tanlab oladi. Aysanemxon bilan kliplar, seriallar orqali tanishmiz. Lekin yaqinmasmiz. U qiz bilan sevishib, muhabbatni boshdan kechirmadik. Mening filmdagi obrazim Rustam Aysanemxonning obrazini sevadi. Men filmda Rustamga aylandim. Syomka tugaganidan keyin holatdan chiqdim. Har bir erkakning o‘z dididagi ayoli bo‘ladi. Aysanemxon mening didimdagi qiz emas. Ayolim juda qattiq rashk qiladi. To‘g‘ri, sevgani uchun rashk qiladi, lekin bu mening ishim, erkak kishimiz biz, tirikchilik sababi kino. Ishimni yaxshi ko‘raman, shuning uchun ayollardan iltimos, erkak kishining shaxsiy hududini buzmang.
“Rashk sabab ajrashish arafasiga keldik”
— 7-8 oy avval oilamiz kuchli rashk sabab ajrim yoqasiga keldi. Jinnilarcha bir insonni sevish — psixologik yaxshi narsa emas. Buning oqibatida fojialar yuz berishi mumkin. Birinchi eng yengili oila buzilishiga, keyinroq esa o‘limgacha olib kelishi mumkin. Ayol kishi o‘zi bilib-bilmay, ko‘nglingizni og‘ritadigan, nafsoniyatingizga tegadigan narsalar gapirib qo‘yadiki, shunaqa paytda “Shuncha umrimni, vaqtim, energiyamni shu ayolga sarflab kelayotganim qanchalik to‘g‘ri ekan? Bundan keyin hayotimni baxshida qilib, bu inson bilan yashash to‘g‘rimikan, arzimaydi-ku bu inson?” deb o‘ylab qolasiz. Bu fikr sekin-asta kuchayaveradi, kuchayganidan keyin yana gapirib qo‘yadi. Aynan mana shunday vaziyat 7 oy avval bizning oilamizda ham bo‘lgan. Rashk, jinnilarcha yaxshi ko‘rish shaxsan menga kerak emas. Jinnilarcha yaxshi ko‘radigan insonga siz bo‘yin egib yashashingiz kerak, men bunday sevgiga tayyor emasman. Bu narsa meni bezillatadi. Bu dunyoda hech bir jonzot haqiqiy, tubsiz, beg‘araz sevgiga arzimaydi. Bunday sevgiga faqat Alloh munosib. Meni bunday sevishlari kerak emas. Ayol kishi erini hurmat qilishi kerak.
Izoh (0)