Har bir inson baxtli bo‘lishga va uni tushungan inson bilan oila qurishga haqli. Afsuski, ko‘pincha juftliklarning dunyoqarashi bir-biriga mos kelmay, ajralishadi. Bu qanchalik og‘riqli mavzu bo‘lmasin, baxtsiz yashagandan ko‘ra qayta baxtli bo‘lishga intilgan afzalroq. O‘zbek san’ati vakillari orasida ham qayta juftini izlagan va bugungi kunda baxtli yashayotganlar bisyor. Keling, ular haqida bilganlarimizni siz bilan bo‘lishamiz.
Sharof Muqimov: “Baxtli kunlar uchun rahmat...”
Xonanda Sharof Muqimov 2010-yili hamkasbi Sevinch Mo‘minova bilan oila qurgandi. Ularning to‘yi o‘zbek shou-biznesidagi eng shov-shuvli to‘ylardan biri bo‘lgan, desak yanglishmaymiz. Sababi u kunga qadar birorta xonandaning to‘yi ochiqchasiga, bunchalik dabdaba bilan o‘tkazilmagandi.
Sevinch intervyularining birida to‘ydan so‘ng besh oy davomida qaynona-qaynotasi bilan bitta uyda yashaganini, so‘ng aytishni joiz deb topmagan “ma’lum bir sabablarga ko‘ra” turmush o‘rtog‘i bilan alohida uyga ko‘chib o‘tganini gapirgandi. “Shu vaqtdan e’tiboran oilamiz buzilishni boshladi, chunki Sharof bir kun men bilan yashasa, bir kun ota-onasi bilan yashardi”, — degandi Sevinch. Xullas, ana shunday vajlarga ko‘ra, ular 2017-yilda rasman ajrashdi. Hozirda xonanda qizi Leylani yolg‘iz tarbiya qilmoqda.
Sharof Muqimov 2018-yili Husnora ismli qiz bilan tanishib, 2019-yilning iyun oyida unga uylandi. 2021-yilning dekabr oyida o‘g‘il farzandli bo‘lishdi.
Husnora talaba, shu bilan birga, Instagram’da ham faol. U mazali yeguliklar bilan turmush o‘rtog‘ini xursand qilishni yaxshi ko‘radi. Sharof Muqimov turmush o‘rtog‘iga Tracker avtomobilini sovg‘a qildi va baxtli kunlar uchun unga minnatdorlik bildirdi.
Shahriyor AQSHdan kelib, uylandi
Bir necha yildan buyon AQSHda istiqomat qilayotgan reper Shahriyor 11-iyul kuni Nurangiz ismli qizga uylandi. To‘y xorijda emas, balki xonanda tug‘ilib o‘sgan Samarqandda bo‘lib o‘tdi. Ammo bu nikoh marosimi xonandaning hayotidagi birinchi to‘y emas. U bundan avval ham oila qurgan va 2016-yili o‘g‘il farzandli bo‘lganini ma’lum qilgandi.
Hamisha shaxsiy hayotini ommadan sir tutadigan ijodkorning navbatdagi to‘y videolari ham tashkilotchilar sabab ijtimoiy tarmoqlarda tarqaldi.
Ahror Usmonov o‘g‘illari bilan aloqani uzmagan
Lirik qo‘shiqlarning mohir ijrochisi Ahror Usmonov ham ikkinchi nikohidan baxt topgan ijodkor hisoblanadi. U avvaliga teleboshlovchi Aziza Usmonova bilan oila qurgan. Ikki nafar o‘g‘il farzandli bo‘lishganidan so‘ng, ular ajrashgan. Shundan so‘ng xonanda katta to‘y-tantanalar bilan Gulbahor ismli qizga uylangan. Hozirda ularning uch nafar qiz farzandlari bor.
Ammo xonanda o‘g‘illari bilan ham munosabatini uzmagan. O‘g‘lining nikoh to‘yida ayoli va qizlari bilan ishtirok etib, ikki yoshga baxt tilagan.
Ali Otajonov shaxsiy hayotini sir tutadi
Taqdir taqozosi bilan bu xonanda ham ikki marta oila qurgan. U 2015-yili oila qurgan, ammo oilaviy kelishmovchiliklar sabab ko‘p o‘tmay ajrashgan. Undan keyin yana oila qurgan. Hozirgi kunda turmush o‘rtog‘i bilan baxtli-saodatli yashamoqda. Ijodkor shaxsiy hayotini ommadan sir tutadi, Instagram tarmog‘iga ham faqat qizalog‘i Maryam bilan tushgan suratlarini joylaydi.
Ulug‘bek Qodirov bir oy yashab, ajrashgan...
Aktyor Ulug‘bek Qodirov 2012-yilning sentabr oyida ota-onasining qistovi bilan uylangan. To‘y katta dabdaba bilan o‘tgan bo‘lishiga qaramay, kuyov bir oydan keyin ajrashishga qaror qilgan. Mish-mishlarga qaraganda, bunga kelinni yoqtirmay uylangani sabab bo‘lgan. 2013-yilning aprel oyida esa aktyor “Shahrizoda” guruhining a’zosi Aziza bilan oila qurgan. Ular 2014-yili qiz, 2016-yilda esa o‘g‘il farzandli bo‘lishganini ma’lum qilishdi.
Karantinda oila qurgan Ulug‘bek Xolmedovning turmushi buzildi
Qiziqchi Ulug‘bek Xolmedov ham, afsuski, ikki marta oila qurgan. Uning ilk nikoh to‘yi 2020-yilning 14-iyun kuni bo‘lib o‘tgan. Karantin kuchaytirilgan payt bo‘lgani uchun Mirzabek Xolmedov to‘yni hovlisida o‘tkazgan. Afsuski, kelin-kuyovlarning munosabati uzoqqa bormay, uzilgan.
2023-yilning 2-iyul kuni Ulug‘bek yana oila qurdi. Uning navbatdagi to‘yi ham dabdabali tarzda o‘tkazildi va unda o‘zbek san’atining ko‘plab vakillari ishtirok etishdi.
Yigitali Mamajonov uchinchi nikohdan baxtini topdi
Aktyor Yigitali Mamajonov 2012-yilning 16-noyabr kuni xonanda Rayhon bilan oila qurgan. 2014-yil esa ular egizak farzandli bo‘lishgan. Afsuski, oradan ko‘p vaqt o‘tmay turli nizolar sabab ular ajrashishga qaror qilishgan. 2016-yilning may oyida Yigitali Mamajonov xonanda Rayhon bilan rasman ajrashganini ma’lum qilgan.
Qozog‘istondagi ijodiy safarlari chog‘ida esa Nigina ismli qiz bilan tanishib qolgan va qiz farzandli bo‘lishgan. Ammo aktyorning bu munosabati ham uzoqqa cho‘zilmagan.
2018-yili esa aktyor Muqaddas Sa’dullayeva bilan oila qurganini ma’lum qildi. Bu nikohidan Abubakr va Xadicha ismli farzandlari bor.
Izoh (0)