Актёр Йигитали Мамажонов ва Муқаддас Саъдуллаеванинг оиласи 7-8 ой аввал ажрим ёқасида эди. Актриса Instagram’даги саҳифасидан турмуш ўртоғи билан тушган суратларини ўчириб ташлаган, улар ижтимоий тармоқда бир-бирини кузатишни тўхтатган эди. Йигитали оиласидаги нотинчликка нима сабаб бўлгани ҳақида “Меҳмонда” YouTube каналига берган интервьюсида сўзлаб берди.
“Ўзбек қизи” фильмида Айсанемхон Юсупова билан севишган жуфтликни ижро этгани ҳақида
— Ҳар бир актёрнинг ўзига яраша методикаси бор. У ўзи учун муайян ҳолатга кириш учун йўналиш танлаб олади. Айсанемхон билан клиплар, сериаллар орқали танишмиз. Лекин яқинмасмиз. У қиз билан севишиб, муҳаббатни бошдан кечирмадик. Менинг фильмдаги образим Рустам Айсанемхоннинг образини севади. Мен фильмда Рустамга айландим. Сёмка тугаганидан кейин ҳолатдан чиқдим. Ҳар бир эркакнинг ўз дидидаги аёли бўлади. Айсанемхон менинг дидимдаги қиз эмас. Аёлим жуда қаттиқ рашк қилади. Тўғри, севгани учун рашк қилади, лекин бу менинг ишим, эркак кишимиз биз, тирикчилик сабаби кино. Ишимни яхши кўраман, шунинг учун аёллардан илтимос, эркак кишининг шахсий ҳудудини бузманг.
“Рашк сабаб ажрашиш арафасига келдик”
— 7-8 ой аввал оиламиз кучли рашк сабаб ажрим ёқасига келди. Жинниларча бир инсонни севиш — психологик яхши нарса эмас. Бунинг оқибатида фожиалар юз бериши мумкин. Биринчи энг енгили оила бузилишига, кейинроқ эса ўлимгача олиб келиши мумкин. Аёл киши ўзи билиб-билмай, кўнглингизни оғритадиган, нафсониятингизга тегадиган нарсалар гапириб қўядики, шунақа пайтда “Шунча умримни, вақтим, энергиямни шу аёлга сарфлаб келаётганим қанчалик тўғри экан? Бундан кейин ҳаётимни бахшида қилиб, бу инсон билан яшаш тўғримикан, арзимайди-ку бу инсон?” деб ўйлаб қоласиз. Бу фикр секин-аста кучаяверади, кучайганидан кейин яна гапириб қўяди. Айнан мана шундай вазият 7 ой аввал бизнинг оиламизда ҳам бўлган. Рашк, жинниларча яхши кўриш шахсан менга керак эмас. Жинниларча яхши кўрадиган инсонга сиз бўйин эгиб яшашингиз керак, мен бундай севгига тайёр эмасман. Бу нарса мени безиллатади. Бу дунёда ҳеч бир жонзот ҳақиқий, тубсиз, беғараз севгига арзимайди. Бундай севгига фақат Аллоҳ муносиб. Мени бундай севишлари керак эмас. Аёл киши эрини ҳурмат қилиши керак.
Изоҳ (0)