“Harakati, ilmi, hunari yo‘q odam kambag‘al bo‘ladi”— deputat Alisher Qodirov yozgan tvit muhokamalarga sabab bo‘ldi

Deputat Alisher Qodirov Twitter‘dagi sahifasida yozgan harakati, ilmi, hunari yo‘q odam kambag‘al bo‘lishi haqidagi tvit muhokamalarga sabab bo‘ldi.

Alisher Qodirovning fikricha, kambag‘allik mag‘lubiyatga rozilikni anglatadi.

“O‘zbekistonda kambag‘allik yo‘q deb uzoq yillar o‘zimizni aldab keldik. 7 yil avval, xalqaro mezonlarga ko‘ra O‘zbekistonda 34 foiz aholi kambag‘al edi, 2023-yilda bu ko‘rsatkich 14 foizgacha qisqaribdi. Xalqaro mezonlar o‘z yo‘liga, kambag‘allik – mag‘lubiyatga rozilik, deb o‘ylayman.

Kim kambag‘al bo‘ladi? Birinchi navbatda harakati yo‘q, ilmi yo‘q, hunari yo‘q odam kambag‘al bo‘ladi! Kimdir hayoti davomida imkoniyat izlasa, kimdir aybdor izlaydi. Menimcha, davlat qancha harakat qilmasin, mag‘lublar kambag‘al bo‘lib qolaveradi”, — deb yozgan u.

Iqtisodchi Otabek Bakirov deputat fikriga munosabat bildirib, inson o‘ziga bog‘liq bo‘lmagan hollarda ham kambag‘al bo‘lishi mumkiniligiga ishora qildi.

“Odam o‘ziga bog‘liq bo‘lmagan ravishda otadan, onadan, boquvchidan ajralib qolishi, nogiron yo cheklangan imkoniyatlar bilan tug‘ilishi, nogiron yo kasal bo‘lib qolishi mumkin, janob Qodir. Uzr, chidab turolmadim. Men mamlakat boyliklarini bir to‘p to‘da egallab olib, millionlab odamlarni qashshoqlashtirayotgani, budjetni o‘z foydasiga taqsimlab, maktabni, tibbiyotni xarob qilish orqali avloddan avlodga o‘tadigan qashshoqlashtirishni boylik to‘plash vositasiga aylantirilganini gapirmayapman”, — deb yozdi iqtisodchi.

Deputat Doniyor G‘aniyev ham Alisher Qodirov fikrlariga o‘z munosabatini bildirdi.

“To‘g‘ri, ilmi, hunari yo‘q, dangasa odam kambag‘al bo‘lishi mumkin. Lekin bu hamma kambag‘al shunday degani emas. Xuddi ahmoq odamlar ham deputat bo‘lishi mumkin, lekin bu hamma deputat ahmoqligini anglatmagandek. Nobel sovrindorlari A.Banerjee va E.Dufloning (‘Poor economics’) fikricha, odamlar mehnat qilmagani uchun emas, balki ko‘p hollarda ‘kambag‘allik qopqoni’ (ochlik, kasallik, ishsizlik, taʼlim ololmaslik)ga tushib qolishi ortidan qashshoqlikdan chiqolmaydi”, — deya fikr bildirgan deputat.

Bloger Zafarbek Solijonov Doniyor G‘aniyevning Twitter‘dagi fikrlari aks etgan skrinshotni Telegramdagi kanalida joylab: “Doniyor G‘aniyev mening deputatim va faxrim”, — deya post qoldirdi.