“Йўл ҳаракатига тўсқинлик қилишда айбланяпсиз” — АҚШда ўзбекистонлик талабани дунёнинг энг адолатли судьяси сўроқ қилди (видео)

Facebook’даги Caught In Providence каналида америкалик ҳуқуқшунос, адолати билан дунёга машҳур бўлган судья Франк Каприо ўзбекистонлик Муҳаммадодилбек Обиджоновни маҳкамада сўроқ қилгани акс этган видео жойланди.

Суд залидаги суҳбатда Франк Каприо Муҳаммадодилбек йўл ҳаракатига тўсқинлик қилганликда айбланаётганини айтган.

Айбланувчи: “бу квартирага кўчиб ўтишимдан олдин, раҳбарият менга ўша ерда машинамни ‘парковка’ қилишимни, муаммо бўлмаслигини айтди ва мен у ерда тўхташга одатланган машиналарни кўрдим. Мен чипта олган ягона машина эгаси эдим, бошқа иккита машина эса ҳеч нарсага (чиптага) эга эмасди”, — дея ҳолатни изоҳлаган.

Судья унга мазкур хатоси учун 35 доллар жарима қўллаган.

Самимий суҳбат давомида судья Муҳаммадодилбек исмини талаффуз қилишга қийналганини айтади. Ундан қаерлик эканини сўрайди. Қанча вақтдан бери бу ердасан, деган саволга, ўзбекистонлик йигит: “бу ерга ўтган йили келдим. Америкадаги Johnson аnd Wаles университети талабасиман. Спорт менежменти билан бизнес бошқарувининг магистратурасида ўқийман”, — дея жавоб берган.

Суҳбат давомида Франк Каприо “кейинчалик ўз ватанингга қайтмоқчимисан ёки шу ерда қоласанми”, деб сўрайди.

“Менинг бир нечта режаларим бор. Олдин профессионал футболчи бўлганман. Шунинг учун ўз агентлигимни очмоқчиман. Бу ўйинчиларга ҳисоблаш ва бошқа ишларда ёрдам беради”, — дея жавоб қилган Муҳаммадодилбек.

Шу билан бирга, судья сизнинг мамлакатингиз ва АҚШ ўртасидаги катта фарқ нимада, дея айбланувчини саволга тутади.

“Мен мамлакатимда ҳеч қачон яшамаганман, чунки Россияда футбол билан шуғулланишимдан олдин бакалавр даражасини Европада тамомлаганман. Яъни Ўзбекистонда туғилганман холос. Ҳаётимнинг деярли кўп қисми мамлакатдан ташқарида ўтган”, — деган судланувчи.

Муҳаммадодилбек судьянинг инглиз тилини қандай қилиб ўргангани ҳақидаги саволига жавобан, тилни Россияда, ўрта мактабда ўрганганини айтган.

Маълумот учун, Франк Каприо АҚШнинг Род-Айленд штати Провиденс шаҳридаги бош муниципал судьяси бўлиб, дунёдаги энг адолатли судья дея таърифланади. Каприо раислигидаги суд мажлислари суратга олинади ва уларни бутун дунё бўйлаб миллионлаб одамлар томоша қилади. У майда жиноятлар ва йўл ҳаракати қоидаларини бузиш ҳолатларини кўриб чиқади. Каприо раислик қилган суд жараёнлари 20 йилдан ортиқ вақт давомида маҳаллий телевидение орқали намойиш этилган.