O‘zbekiston Transport vazirligi va Gruziya iqtisodiyot va barqaror rivojlanish vazirligi transport sohasidagi hamkorlik to‘g‘risida o‘zaro anglashuv memorandumi imzoladi, deb xabar bermoqda vazirlik matbuot xizmati.
Memorandum Gruziya dengiz portlarida dengiz terminali/omborxonalarni qurish/uzoq muddatli lizingga olish, fuqaro aviatsiyasi sohasida hamkorlik, avtomobil transportida tashuvlarni rivojlantirish hamda transport va infratuzilma yo‘nalishida o‘zaro hamkorlikda tadqiqotlar olib borish, innovatsiyalarni qo‘llashni o‘z ichiga oladi.
Ushbu hujjat bosh vazir Abdulla Aripov boshchiligidagi delegatsiya 17–18-iyul kunlari Tbilisiga tashrifi doirasida imzolandi. Tashrif davomida Abdulla Aripov Gruziya hukumati rahbari Irakliy Garibashvili bilan uchrashib, turli sohalardagi hamkorlik aloqalarini rivojlantirish masalalarini muhokama qilgandi.
Irakliy Garibashvili 2021—2022-yillarda O’zbekiston va Gruziya o‘rtasida ikki tomonlama tovar ayirboshlashda sezilarli o‘sish kuzatilganini, Gruziya O‘zbekistonni muhim hamkor deb bilishini, investitsiyalarni jalb qilish bo‘yicha hamkorlikdan manfaatdor ekanligini hamda o‘zbek investorlarni Gruziyada kutib olishdan mamnun ekanini ta’kidlagan.
Transport vazirligi xabariga ko‘ra, O‘zbekistonning Gruziya portlari (Poti, Batumi) orqali eksport-import yuk tashish hajmi 864 ming tonnani tashkil etdi. Ushbu ko‘rsatkich 2021-yilga nisbatan 72 foizga ko‘p (2021-yilda 503 ming tonna).
Izoh (0)