Bosh vazir Abdulla Aripov boshchiligidagi delegatsiya 17–18-iyul kunlari Tbilisida bo‘lib, Gruziya hukumati bilan muzokaralar o‘tkazdi.
O‘zbekiston hukumati matbuot xizmatining xabar qilishicha, Abdulla Aripov Gruziya bosh vaziri Irakliy Garibashvili boshchiligidagi ikki mamlakat hukumatlari delegatsiyalari yig‘ilishida Oliy darajada erishilgan kelishuvlar ijrosini ta’minlash, ikki tomonlama hamkorlik aloqalarini yanada rivojlantirish masalalari muhokama qilindi.
Yig‘ilishda O‘zbekiston tomoni Gruziyaga elektrotexnika mahsulotlari, avtomobillar, tayyor to‘qimachilik mahsulotlari, sarxil va quruq meva-sabzavotlar, polimer va kimyo mahsulotlari yetkazib berishga tayyorligi bildirildi.
Ma’lum qilinishicha, bugungi kunda ikki davlat kompaniyalari ishtirokida amalga oshirilishi rejalashtirilgan ko‘plab investitsiya loyihalari va savdo shartnomalari ro‘yxati imzolash uchun tayyorlangan.
Yig‘ilishda transport-logistika sohasidagi hamkorlik mamlakatlar o‘rtasidagi munosabatlarning ustuvor yo‘nalishlaridan biri ekanligi qayd etildi.
Shuningdek, O‘zbekiston va Gruziyaning boy madaniy va tarixiy merosi turizm sohasini yanada rivojlantirish, madaniy-gumanitar almashinuvlarni ko‘paytirish uchun qulay zamin yaratmoqda. Buning uchun kelgusida birgalikda turlar tashkil etish, mehmonxona biznesida sayyohlik kompaniyalari va tuzilmalari o‘rtasida hamkorlikni yo‘lga qo‘yish zarur.
Yig‘ilish yakunida qator ikki tomonlama hujjatlar imzolandi.
O‘zbekiston hukumati delegatsiyasining Gruziyaga rasmiy tashrifi doirasida Batumi va Poti shaharlaridagi xalqaro dengiz portlari faoliyati bilan ham yaqindan tanishildi.
Gruziya bosh vazirining 2022-yil O‘zbekistonga tashrifi chog‘ida Shavkat Mirziyoyev qabulida bo‘lib, ikki tomonlama amaliy hamkorlikni yanada kengaytirishga kelishib olingandi.
Izoh (0)