O‘zbekistonda 2023-yilning birinchi yarim yilligida jismoniy shaxslarning 970 milliard so‘mdan ortiq qarzi hisobdan chiqarildi. Bu haqda Soliq qo‘mitasining “Fiskal tahlillar” Telegram kanali xabar berdi.
Unga ko‘ra, 2023-yil 14-iyundagi prezident qarorga asosan 5,4 million nafar jismoniy shaxslarga mol-mulk va yer solig‘i qarzdorligi uchun hisoblangan 501,9 mlrd so‘m penya hisobdan chiqarildi. 457,5 mingta yakka tartibdagi tadbirkor uchun jismoniy shaxslardan olinadigan daromad solig‘i va ijtimoiy soliq bo‘yicha hisoblangan 476,8 milliard so‘m soliq qarzi, penya va jarimalar hisobdan chiqarildi.
Shuningdek, 2023-yilning o‘tgan davrida 1 013 ta tadbirkorlik subyektlariga 613,9 milliard so‘mlik soliqlarni to‘lash muddatini o‘zgartirish imkoniyati berildi.
Ma’lumot uchun, prezidentning 2023-yil 14-iyundagi qaroriga asosan, quyidagilar hisobdan chiqariladi:
- 1-iyun holatiga ko‘ra jismoniy shaxslardan olinadigan mol-mulk solig‘i va yer solig‘i (noturar ko‘chmas mulk obyektlari bundan mustasno) bo‘yicha muddatida to‘lanmagan qarziga hisoblangan penya summalari;
- 1-iyun holatiga ko‘ra oxirgi 6 oy mobaynida moliya-xo‘jalik faoliyatini amalga oshirmayotgan YTTlarning qatʼiy belgilangan miqdorlardagi jismoniy shaxslardan olinadigan daromad solig‘i va ijtimoiy soliqdan vujudga kelgan qarzi, hamda ularga hisoblangan penya va jarimalar summasi;
- xo‘jalik yurituvchi subyektlarning tashqi savdo operatsiyalari bo‘yicha muddati o‘tgan debitor qarzdorligi uchun qo‘llanilgan jarimalar summasi.
Ushbu soliq qarzi, penya va jarimalarni undirish bilan bog‘liq sud va ijro ishlari tugatiladi.
Izoh (0)