Tovlamachilik va firibgarlikda ayblanayotgan Abduqodir Mo‘minovdan jabrlanganlar soni ma’lum qilindi

Abduqodir Mo‘minov ishi bo‘yicha sud majlisi 25-iyulda boshlanadi. Bu haqda Oliy sud axborot xizmati rahbari Aziz Abidov xabar berdi.

Ma’lum qilinishicha, unga doir jinoyat ishi jinoyat ishini ko‘rib chiqish Mirobod tuman sudining ish yurituviga kelib tushgan bo‘lib, sud jarayoni S. Sodiqov raisligida 25-iyul kuni soat 15.00 da boshlanadi.

YouTube platformasidagi “Ko‘zgu” sahifasi muallifi, bloger Abduqodir Mo‘minov Jinoyat kodeksining 141-1-moddasi (shaxsiy hayot daxlsizligini buzish) 2-qismi “a”, “b” bandlari, 165-moddasi (tovlamachilik) 3-qismi “a” bandi, 168-moddasi (firibgarlik) 3-qismi “b”, “v” bandlari, 4-qismi “a” bandi, 189-moddasi (savdo yoki xizmat ko‘rsatish qoidalarini buzish) 1-qismi va 28,211-moddasi (pora berishda ishtirokchilik) 3-qismi “a” bandida nazarda tutilgan jinoyatlarni sodir etganlikda ayblanmoqda.

Tasdiqlangan ayblov xulosasiga ko‘ra mazkur jinoyat ishi bo‘yicha 14 nafar jabrlanuvchi mavjud bo‘lib, jinoyat oqibatida ularga jami 903 421 567,5 so‘m miqdorida moddiy zarar yetkazilgani aniqlangan.