Намангандаги ташкилотнинг 80 нафар ишчиси икки ойдан бери маош ололмаяпти. Масъул икки ойлик муаммони икки кунда ҳал этишини айтди

Наманган вилоятининг Янгиқўрғон туманидаги Автомобиль йўлларидан фойдаланиш унитар корхонаси ишчилари икки ойдан бери маош ололмаётганини айтмоқда. Бу ҳақда хабар берган ишчилардан бирининг айтишича, раҳбарият бу муаммога эътиборсиз қарамоқда.

Корхонада оддий ишчи бўлиб ишлаб келамиз. Бизни қийнаётган муаммо шундаки, раҳбарият икки ойдан бери ойлик бермаяпти. 2023 йилнинг 15 июнь куни 600 минг сўмдан пластик картамизга ташлаб беришганди. Ўшандан бери пул беришмаяпти, — дейди исми сир қолишини сўраган ишчи.

Корхона ишчисининг қўшимча қилишича, маошсизлик сабаб айни пайтда унинг рўзғорида муаммолар кузатилмоқда.

Ҳозир егани нонимиз ҳам қолмади, — дейди мурожаатчи.

“Дарё” журналисти билан суҳбатлашган масъул — Янгиқўрғон туман автомобиль йўлларидан фойдаланиш унитар корхонаси ҳисобчиси Саиджон Маматов ишчилар ойлик ололмаётганини тасдиқлади.

Корхонада 80 нафар ходим фаолият юрица, июнь ойи маоши ва июль ойи авансини ҳали тўлаб беролмадик. Корхона ҳисоб рақамида пул йўқлиги сабаб шу муаммо юзага келган. Аммо муаммо ечими билан шуғулланяпмиз, — дейди Саиджон Маматов.

Корхона ҳисобчисининг айтишича, ташкилот қурилиш ишларини амалга ошириб, топган маблағи ҳисобидан ўзини ўзи молиялаштиради.

Бунақа ҳолат бўлмас эди. Муаммони икки кунда, узоғи билан жума-шанба кунларида ҳал этамиз, — дейди масъул.

“Дарё” воқеалар ривожини кузатишда давом этади.