Amerikalik aktrisa va model Lindsi Lohan ilk marta ona bo‘ldi, deb xabar bermoqda Peopletalk nashri.
Aktrisa va Bader Shammasning oilasida o‘g‘il farzand dunyoga kelgan. Juftlik chaqaloqqa Luay deb ism qo‘ygan.
Ma’lumot uchun, Lindsi Lohan 1986-yilning 2-iyul sanasida AQSHning Nyu-York shtatida tug‘ilgan. Lindsi Lohan 90-yillarning oxirida “Ota-onalar uchun tuzoq” filmidagi ajoyib ijrosi bilan millionlab tomoshabinlar qalbidan joy oldi. Aktrisaning kelib chiqishi italyan va irland ildizlariga borib taqaladi. U 3 yoshida modellik qila boshlaydi, parallel ravishda turli reklamalarda ham suratga tushadi.
10 yoshida Lindsi “Boshqa dunyo” serialida rol o‘ynaydi. Lohanning so‘nggi 10 yildagi birinchi yirik va chinakam arziydigan kinodagi roli “Unutilmas Rojdestvo” deb nomlangan. Film 2022-yil noyabr oyida ekranlarga chiqdi.
Aktrisa va arab moliyachisi Bader Shammasning munosabatlari haqidagi mish-mishlar ilk bor 2020-yilda tarqalgan. Keyinchalik Dubaydagi festivalda ko‘rishgan juftlik 2021-yilning kuzida unashtirilganliklarini e’lon qildi. Aktrisa bir yildan so‘ng, 2022-yilning iyul oyida Bader bilan turmush qurdi.
Izoh (0)