Birinchi turmushi omadsizlikka uchragach, ikkinchi yoki uchinchisidan baxt topgan o‘zbek shou-biznesi vakillari (foto)

Hayotimiz doim ham biz istagandek bo‘lmaydi. Ba’zan eng yaqin deb bilgan insonlarimiz uzoqlashadi, yoki aksincha begonalar yaqinlarimizga aylanadi. Mashhurlarning hayot yo‘llari ham bundan mustasno emas.

Ular yetti yildan so‘ng ajrashishlarini tasavvur ham qilmagandi

2010-yildagi yulduzlar juftligining to‘yi katta shou-shuvlarga sabab bo‘lgandi. Hatto Sharof Muqimov va Sevinch Mo‘minovaning nikoh oqshomining video disklari sotuvga ham chiqarilgandi. Afsuski, mashhur yulduzli juftlikning baxtli onlari uzoqqa cho‘zilmadi. Oilada dunyoga kelgan qizaloq ham uni saqlab qololmadi. Sevinch intervyularining birida to‘ydan so‘ng besh oy davomida qaynona-qaynotasi bilan bitta uyda yashashganini, so‘ng aytishni joiz deb topmagan “ma’lum bir sabablarga ko‘ra” turmush o‘rtog‘i bilan alohida uyga ko‘chib o‘tganini gapirgandi. “Shu vaqtdan e‘tiboran oilamiz buzilishni boshladi, chunki Sharof bir kun men bilan yashasa, bir kun ota-onasi bilan yashardi”, — degandi Sevinch.  Xullas, ana shunday vajlarga ko‘ra, ular 2017-yilda rasman ajrashdi. Xonanda Sevinch esa  qizi Leylani yolg‘iz tarbiya qilmoqda.

Shundan so‘ng Sharof Muqimov 2019-yilda surxondaryolik muxlisasi bilan oila qurdi. Xonanda intervyularining birida rafiqasi haqida shunday degan edi:

“Birinchi turmushim bilan shunaqa vaziyat bo‘lib qolgan. Biz ham xohlamaganmiz oilamiz o‘xshamay qolishini. Taqdir ekan. Ikkinchi marta turmush qurdim, ko‘z tegmasin, judayam yaxshi. Har tomonlama xursandman. Otamning ham duolarini olib kelyapti. Kuyovlarga aytadigan bir gapim bor, uylanishdan oldin kelinga shart qo‘yish kerak. Men ham shunday shart qo‘yib uylandim. Unga mening muhabbatim kaliti — bu sening yaqinlarimga beradigan mehring. Sen qancha mening aziz insonlarimga mehr bersang, mening eng katta muhabbatimga sazovor bo‘lasan. Oilamizning baxt-u kamoli faqat erkakka emas, ayol kishiga ham bog‘liq, deb turmush qurdik. O‘zi turmush qurishimiz ham oson bo‘lmadi. Quda tomonda ham turli xavotirlar bo‘ladi. Qaynonam ham juda yaxshi inson. Surxondaryoning Sherobod tumanidan. Qiziga yaxshi tarbiya bergani sababli dadam har kuni duo qiladilar hozirgi ayolimni. Qolaversa, men ham juda mamnunman. Hammaga go‘zal baxt tilab qolaman. Har doim ota-onaning qadriga nafaqat biz o‘g‘il farzandlar, balki kelinlar ham yetishiga tilakdoshman”.

Zarina Nizomiddinova uchinchi turmushidan tinchidi

Aktrisa Zarina Nizomiddinova juda erta oila qurganini ta’kidlaydi. Katta o‘g‘li Temurbekni ham 18 yoshida dunyoga keltirgan. Xorijdagi turmushi u qadar muvaffaqiyatli kechmagach, Toshkentga qaytib ijodini davom ettirgan. 2015-yilning 18-yanvar kuni esa ikkinchi bor  oila qurdi. Navbatdagi turmush o‘rtog‘i o‘zidan ancha katta va tadbirkorlik bilan shug‘ullandi. Afsuski, aktrisaning bu nikohi ham uzoqqa cho‘zilmadi.

Oradan to‘rt yil o‘tib aktrisaning shaxsiy hayotida yana bir o‘zgarish sodir bo‘ldi. U Moskva shahrida istiqomat qiluvchi, o‘zidan 12 yosh katta inson bilan oila qurdi va 2020-yilda Saidumar ismli o‘g‘lini dunyoga keltirdi.

Yana bir yulduzli juftliklardan biri Rayhon va Yigitali edi. Ular 2012-yilda oila qurgan va 2014-yilda Imron va Islom ismli egizak farzandlarning ota-onasi bo‘lgandi. Ammo oradan hech qancha vaqt o‘tmay, ularning shaxsiy hayotiga putur yetganligi haqidagi mish-mishlar tarqaldi. 2016-yilda yulduzli juftlikning nikohi rasman bekor qilindi. Shundan so‘ng Yigitali chimkentlik Nigina ismli qiz bilan oila qurdi, oilada qiz farzand dunyoga keldi, aktyorning bu turmushi ham o‘xshamadi.

2016-yilning noyabr oyida esa Rayhon boshlovchi Farhod Alimov bilan nikohdan o‘tganligi bilan bog‘liq xabarlar tarqaldi. Rayhon omma oldida ikkinchi bor kelinlik libosini kiyishni istamadi, faqatgina nahorgi osh berish bilan kifoyalandi. Farhod Alimov ham uch farzandli bo‘lgach, birinchi turmushi bilan ajrashgan. Hozirda Farhod va Rayhon besh farzandini birgalikda voyaga yetkazmoqda. Ular bolalarni olib, xorijiy mamlakatlarga sayohatlarga tez-tez borib turadi.

O‘zbek shou-biznesining yorqin yulduzlaridan biri bo‘lgan Lola 2005-yilda Shohrux ismli tadbirkor yigit bilan oila qurgan. Shov-shuvli nikoh oqshomi haqida hatto telekanallar uchun reportaj ham tayyorlangandi. Ammo dabdabali to‘y Lolaga baxt keltirmadi. Juftlik nikohi davomida bir qiz, bir o‘g‘ilning ota-onasiga aylandi. Xonanda o‘g‘li Shohdiyor dunyoga kelgach, ajrashishga qaror qildi. Lola va Shohruxning nikohi 2011-yilda rasman bekor bo‘ldi.

“Biz sobiq turmush o‘rtog‘im bilan tanishganimizda 18 yoshda edim. U meni turmushga chiqishga ko‘ndirish uchun bir yil ‘mehnat qildi’, bizning to‘yimizga tish-tirnog‘i bilan qarshi bo‘lgan ota-onamni ko‘ndirish uchun esa yana bir yil sarfladi. U hammamizni ko‘ndirish uchun barcha mahoratini ishga soldi. Shu tarzda oradan 2 yil o‘tib, biz unga taslim bo‘ldik. Otam sobiq turmush o‘rtog‘imdan to‘ydan keyin o‘qishimni davom ettirishim hamda o‘tgan yillar mobaynida erishgan karyeramni davom ettirish va’dasini oldi. Erkaklar qo‘l tashlashdi, non sindirildi, to‘yimiz bo‘ldi.

To‘ydan keyingi 5 yil davomida men faqat uy ishlari bilan shug‘ullanib, uyda o‘tirdim. Biz shahardan 30 kilometr uzoqlikda yashardik, men deyarli uydan ko‘chaga chiqmasdim. Menga o‘qishimni davom ettirishga ham ruxsat berishmadi. Chunki bu yangi kelinchakka uydagi majburiyatlarini bajarashiga xalaqit berardi. Shu tarzda Vestministerni tamomlay olmadim. O‘qishimni yuridik universitetning sirtqi bo‘limiga ko‘chirishdi.

Bir muddat o‘zini ijodga bag‘ishlagan Lolaning hayotida ma’lum o‘zgarishlar sodir bo‘ldi. Moskvaga serqatnov bo‘lib qolgan xonanda 2017-yilda tojik millatiga mansub, asli samarqandlik, Moskvada o‘z biznesiga ega inson bilan oila qurganini oshkor qildi. Hozirda ularning Aisha ismli qizalog‘i ham bor. Hozirda Lola ijoddan biroz chekinib, uch farzandining tarbiyasi bilan band.

Muqaddas Sa’dullayeva chin baxtini ikkinchi turmushidan topdi

Aktrisa Muqaddas Sa’dullayevaning ham shaxsiy hayoti sokinlikdan iborat emas. U 2014-yilning 5-noyabrida Sanjar ismli yigit bilan oila qurgan. Ammo ularning baxtli onlari bir yilga ham yetib bormadi. Aktrisa to‘ydan so‘ng olti oy o‘tib, homiladorligida ota uyiga qaytib kelib, qizi Sa’diyaxonni ota uyida dunyoga keltirdi.  Qator klip va filmlarda suratga tushgandan so‘ng yana aktrisa ekranlarda ko‘rinmay qoldi. U 2018-yilgi taqdimotlarning birida homilador qiyofada ko‘rinish berdi.  Uni ko‘pchilik xonanda bilan oila qurgan (bunga kliplardagi ishtiroki sabab) deb taxmin qilishdi. Farzandi tug‘ilgach, u turmush o‘rtog‘i Yigitali Mamajonov ekanligini oshkor etdi. Hozirda aktyorlar juftligi uch farzandni voyaga yetkazmoqda.

VIA Sharq guruhidagi Sarvar guruh a’zosi Tatyanaga uylanishdan avval oila qurgandi. Ba’zi sabablarga ko‘ra, birinchi oilasi bilan ajrashib, 2011-yili sahnadagi duetdoshi Tatyana bilan oila qurishga qaror qilgan. Oradan besh yil o‘tib, 2016-yilda o‘g‘il farzandli bo‘lishadi. Farzand ikki ijodkorning shaxsiy hayotidagi rishtalarni yanada mustahkamladi. Hozirgi kunda ularning Alixon, Maryam va Matin ismli farzandlari bor.

Shahzoda Matchonova ayollik baxtini ikkinchi turmushidan topdi

Aktrisa Shahzoda Matchonova 2016-yilning 25-noyabr kuni Omar ismli yigit bilan oila qurgandi. Yoshlarning nikoh oqshomi Toshkentdagi eng katta restoranlarning birida bo‘lib o‘tgan. Shundan so‘ng aktrisa shaxsiy hayoti haqida gapirmadi, odamlarning e’tibori ham susaydi. Ammo aktrisa 2019-yili Instagram’dagi stories’larining birida “Ajrashganmisiz?” degan savolga “Ha” deb javob berdi.

2021-yil esa qizalog‘i Raniyani dunyoga keltirdi.

Jo‘rabek ikki marta sevgisiz turmush qurgan

“O‘zbek Tarkani” — Jo‘rabekning birinchi turmushi omadsiz kechgan. Xonanda ikkinchi ayoli bilan baxtli ekanligi, biroq uni sevmay uylanganini aytadi.

“Uylanish mavzusiga boshqacha qarardim. Hammasi kinolardagidek bo‘lishini, bir kuni sevib qolib, uylanishni xohlardim. Negadir o‘zbek emas, boshqa millat vakiliga uylanishni xohlardim. Lekin birinchisida ham, ikkinchisida ham bu narsaga tayyor emasdim.

Birinchi marta uylanganimda uydagilar majburlashgan. Ikkinchisida tanlash huquqi bo‘ldi. Uydagilarim qaysi millat vakiliga bo‘lsa ham, uylan, deyishdi. Niyatim koreysga uylanish edi. Koreyslar hech qarimaydi. Har doim chiroyli, yosh bo‘lib yurishadi. Lekin boshqa millatdan so‘kmaydigan va sigaret chekmaydigan qiz topa olmadim.

Ikkinchi ayolimni ‘Odnoklassniki’dan topganman. U jismoniy tarbiya institutida o‘qirkan. U yerda do‘stlarim ishlardi, qo‘ng‘iroq qilib, surishtirdim. Qizni rosa maqtashdi. Keyin uchrashib, tanishdik, gaplashdik. O‘sha jarayonda o‘zimdan boshqa hech kimni sevib qola olmasam kerak, degan fikr keldi. Yaxshisi, shunchaki inson tanlash kerak ekan, deb o‘yladim. U sportchi, qaddi-qomati joyida, sog‘lom qiz bo‘lgani uchun uylanganman.

Boshida sevmay turmush qurib, hayotimizni barbod qildik, deb o‘ylardik ikkalamiz ham. Lekin keyinchalik tushundikki, bu ishni to‘g‘ri qilganmiz. Sevgi qanaqadir ortiqcha narsa ekan turmushda. Sababi sevgan odamingizdan yomon narsa ko‘rsangiz, ko‘nglingiz qolib ketadi. Sevmagan odamingiz bilan bunaqa bo‘lmaydi”, — deydi xonanda.