Britaniyalik aktrisa Emili Blant oilasiga yetarlicha vaqt ajratish maqsadida o‘z ishidan tanaffus olishga qaror qildi. U farzandlarining hayotida muhim jarayonlar bo‘layotgani, shu sababli ularga e’tibor qaratish uchun karyerasini yakunlagani haqida so‘zlab berdi.
Aktrisa bu qarorni uzoq o‘yladi. U faoliyati davomida “Qattiqqo‘l xonim”, “Sokin joy”, “Meri Poppins qaytadi”, “Jungli bo‘ylab Kruiz”, “Oppengeymer” va boshqa yirik loyihalarda ishtirok etgan. Emili haqiqatan ham mashhurlik cho‘qqisiga chiqdi.
“Hozir insonlar: ‘Siz qanday qilib ularga ulgurasiz? Qanday qilib muvozanatni saqlay olasiz?’, deb so‘raydi. Hammasini to‘g‘ri bajarayotganimga ishonchim komil emas”, — deydi aktrisa.
Biroq, tanganing ikkinchi tomoni ham mavjud. Faol hayot tufayli aktrisa oilasiga yetarlicha vaqt ajrata olmadi, bu uning faoliyatidagi tanaffusga sabab bo‘ldi.
“O‘tgan yili juda ko‘p ishladim. Eng katta farzandim to‘qqiz yoshga kirdi. Hozirda farzandlarimning hayotida muhim voqealar sodir bo‘layotganini his qilyapman. Ular mendan: ‘Meni uyg‘otasizmi?’, ‘Meni maktabga olib borasizmi?’, ‘Meni olib ketasizmi?’, ‘Meni uxlatib qo‘yasizmi?’, deb ko‘p so‘rashadi. Men ular bilan birga bo‘lishim kerak”, — deydi aktrisa.
Emili qizlarining oldida o‘zini aybdordek his qilishi haqida so‘zlab berdi. U o‘z farzandlariga o‘rnak bo‘lishni xohladi, biroq uning karyerasi bundan ustun bo‘lib qoldi.
“Hozir ko‘p vaqt talab qiladigan loyihalarga qiziqmayman. Ular mendan va farzandlarimdan katta ma’naviy xarajatlarni talab qiladi”, — deydi Emili.
Izoh (0)