Chuvashiya Respublikasiga ishlash uchun borib, biroq aldanib qolgan o‘zbekistonliklarning bir guruhi vatanga qaytarildi, deb xabar beradi Tashqi mehnat migratsiyasi agentligi.
Ma’lum qilinishicha, Tashqi mehnat migratsiyasi agentligining Nijniy Novgorod shahridagi vakilligiga Cheboksari shahrida ishlayotgan bir guruh O‘zbekiston fuqarolari ish beruvchisi oylik maoshi va pasportlarini bermayotgani, yashab turgan xostelidan chiqarib yuborgani yuzasidan murojaat qilgan.
Aniqlanishicha, O‘zbekiston fuqarolari ijtimoiy tarmoqlardagi yolg‘on maʼlumotlarga ishonib, Chuvashiya Respublikasining Cheboksari shahriga non va qandolat mahsulotlari ishlab chiqarish sexiga avtobuslarda ish beruvchi hisobidan ishlash uchun borgan.
Ish beruvchi hujjatlarni rasmiylashtirish uchun fuqarolarning pasportlarini olib qo‘ygan va bir necha oy davomida ish haqisiz ishlatgan. Hujjatlarini qaytarib bermay, nomaʼlum joyga qochib ketgan.
Tashqi mehnat migratsiyasi agentligi vakolatxonasi, O‘zbekistonning Qozon shahridagi Bosh konsulxonasi va o‘zbek diasporasi vakillari saʼy-harakati bilan fuqarolar xostelga joylashtirilib, issiq ovqat bilan taʼminlangan.
Fuqarolarning bir guruhiga Bosh konsulxona tomonidan vatanga qaytish sertifikati rasmiylashtirib berilgan. Agentlik tomonidan 12 nafar fuqaro Qozon—Toshkent yo‘nalishidagi aviareys orqali O‘zbekistonga qaytarilgan.
Bundan oldin Vladivostokda og‘ir ahvolga tushib qolgan o‘zbekistonlik ayol va uning ikki nafar farzandi, Rossiyada noqonuniy mehnat bilan shug‘ullangan 47 nafar o‘zbekistonlik hamda Hindistonda qariyb 2 yildan beri hibsda ushlab turilgan uch nafar o‘zbekistonlik ayol vatanga qaytarilgani to‘g‘risida xabar berilgandi.
Izoh (0)