Yoshlar siyosati va sport vazirligi 21-iyun—6-iyul kunlari oralig‘ida “O‘zbekiston davlat sport akademiyasi faoliyatini tashkil qilish chora-tadbirlari to‘g‘risida“gi prezident qarori loyihasi jamoatchilik muhokamasiga qo‘ydi. Hujjatga ko‘ra, 2025-yilda Toshkent shahar Yashnobod tumanidagi Olimpiya shaharchasiga yangi O‘zbekiston davlat sport akademiyasi joylashtiriladi.
Qayd etilishicha, Yoshlar siyosati va sport vazirligi hamda Oliy ta’lim, fan va innovatsiyalar vazirligi 2025-yil 1-yanvardan boshlab Oliy sport mahorati instituti negizida O‘zbekiston davlat sport akademiyasini tashkil etadi. Jismoniy tarbiya va sport ilmiy tadqiqotlar instituti ushbu Sport akademiyasi huzuriga o‘tkaziladi.
Quyidagilar Sport akademiyasining asosiy vazifalari va faoliyati yo‘nalishlari etib belgilanadi:
- jismoniy tarbiya va sport sohasida zamon talablariga javob beradigan kadrlarni, Osiyo va paraosiyo, olimpiya va paralimpiya o‘yinlarida, shuningdek, jahon kubogi hamda chempionatlarida natija ko‘rsatadigan sportchilarni tayyorlash;
- kadrlarni tayyorlashda ilg‘or ta’lim texnologiyalarini va xorijiy tajribalarni qo‘llagan holda o‘quv jarayonini tashkil qilish;
- davlat va nodavlat sport tashkilotlari sport bazalaridagi o‘quv mashg‘ulot yig‘inlarini tahlil qilish jarayoniga professor-o‘qituvchilar va talabalarni jalb etish, mashg‘ulotlarni o‘tkazishning ilg‘or usullarini joriy etish;
- yuqori sport natijalariga erishgan taniqli sportchilarning jismoniy, texnik, taktik va psixologik xususiyatlarini tahlil qilish, zamonaviy sport nazariyasi va amaliyoti, elita sportchilarni tayyorlash, usullari va xususiyatlarini o‘rganish;
- Respublika, Osiyo, Jahon chempionatlari va kuboklarini hamda olimpiya va paralimpiya o‘yinlarini muntazam tahlil qilib borish, elita sportchilarni tarbiyalash, axloqiy tarbiyalash va boshqarish, doping nazorati, xalqaro musobaqalar tahlil natijalarini tajribada qo‘llash;
- sportchi va trenerlik faoliyatining tadqiqot usullari, zamonaviy sport yutuqlaridan foydalanish ko‘nikmalarini shakllantirishga oid ilmiy-amaliy tadqiqotlarni amalga oshirish.
Sport akademiyasi yuridik shaxs maqomiga ega bo‘lgan oliy ta’lim muassasasi hisoblanadi. O‘quv jarayoni 2025/2026-o‘quv yilidan boshlanadi.
Shu va keyingi o‘quv yillarida Sport akademiyasiga o‘qishga qabul kvotalari oliy ta’lim muassasalariga har yilgi qabul kvotalari belgilangan tartibda shakllantiriladi.
Sport akademiyasiga talabalarni qabul qilish parametrlari davlat buyurtmasi sifatida har bir sport turining xususiyatidan (vazn toifasi, sportchilar soni, shu jumladan sportchi-ayollar soni, jamoaviy sport turlari bo‘yicha tegishli sport turida ishtirok etadigan sportchilar soni va boshqalar) kelib chiqib, hududlarda iqtidorli yoshlarni aniqlash, tanlash va saralash (seleksiya) maxsus sport tizimini boshqarish platformasida shakllangan Olimpiya va Paralimpiya sport turlariga tayyorlash markazlari bitiruvchilarining sport natijalari asosida shakllantiriladi. Shuningdek:
- Sport akademiyasiga talabalarni qabul qilish shaffof va ochiq tanlov asosida o‘tkaziladi;
- Sport akademiyasida o‘qish moslashtirilgan o‘quv rejalari va dasturlari asosida tashkil etiladi;
- Sport akademiyasi bitiruvchilariga tanlangan sport turi bo‘yicha “trener” mutaxassisligi beriladi;
- Sport akademiyasi bitiruvchilariga O‘zbekiston Respublikasida oliy ta’lim to‘g‘risidagi hujjat sifatida tan olinadigan davlat namunasidagi diplom beriladi;
- Sport akademiyasi bitiruvchilariga to‘g‘ridan to‘g‘ri sport bo‘yicha hakam hamda ikkinchi toifali trener malaka toifasini belgilovchi guvohnoma beriladi.
Izoh (0)