Rossiyaning Vladivostok shahrida mushkul ahvolga tushib qolgan O‘zbekiston fuqarolariga yordam ko‘rsatildi, deb xabar bermoqda “Dunyo” axborot agentligi.
Qayd etilishicha, Y.K. ismli ayol O‘zbekistonning Vladivostok shahridagi Bosh konsulligiga murojaat qilgan. U ikki nafar voyaga yetmagan farzandi bilan Primorsk o‘lkasining Vladivostok shahrida mushkul moliyaviy vaziyatga tushib qolganini bildirib, vatanga qaytishda ko‘mak so‘ragan.
Bosh konsulxona tomonidan fuqaroning murojaati o‘rganib chiqilishi jarayonida aniqlanishicha, ayol 2013-yilda Rossiyaning Primorsk o‘lkasiga vaqtinchalik mehnat faoliyatini amalga oshirish uchun kelib, so‘nggi vaqtlarda Vladivostok shahrida joylashgan uy hayvonlariga xizmat ko‘rsatish salonida yordamchi lavozimida ishlab kelgan. Oylik maoshi kamligi, yashashi hamda uy ijarasi uchun yetarli bo‘lmagani sababli ikki nafar voyaga yetmagan farzandi bilan moddiy jihatdan mushkul ahvolga tushib qolgan.
Y.K. va uning voyaga yetmagan farzandlari nomiga “Mehr” loyihasi jamg‘armasi hisobidan Vladivostok—Toshkent yo‘nalishi bo‘yicha uchadigan havo qatnoviga chiptalar xarid qilingan va ular O‘zbekistonga kuzatib qo‘yilgan.
Izoh (0)