Oliy Majlis Qonunchilik palatasining navbatdagi majlisida “O‘zbekiston Respublikasining Budjet kodeksiga qo‘shimcha va o‘zgartirishlar kiritish to‘g‘risida”gi qonun loyihasini ikkinchi o‘qishda ko‘rib chiqildi. Bu haqda parlament quyi palatasi matbuot xizmati xabar berdi.
Qayd etilishicha, vazirliklar va idoralarning ichki audit xizmatlari tomonidan o‘tkaziladigan masofaviy audit tadbirlarining ko‘lami va sifatini oshirish, ichki audit xizmatlarining xavflarni aniqlash hamda ularning oldini olish imkoniyatlarini kengaytirish va samaradorligini oshirish tadbirlari ko‘rilmoqda.
Bundan tashqari, 2022—2026-yillarga mo‘ljallangan Yangi O‘zbekistonning Taraqqiyot strategiyasida ham Davlat budjeti xarajatlari samaradorligini yanada oshirish va davlat moliyaviy nazorati organlari faoliyatini takomillashtirish belgilangan.
Mazkur qonun loyihasi bilan tumanlar va shaharlar hokimliklari jamoatchilik fikri asosida shakllantirilgan tadbirlarni moliyalashtirish to‘g‘risidagi maʼlumotlarni o‘z rasmiy veb-saytlari hamda “Ochiq budjet” axborot portaliga joylashtirish nazarda tutilmoqda.
Qonun loyihasining qabul qilinishi, moliyaviy nazoratni takomillashtirishga, budjet jarayonining ochiqligini taʼminlashga xizmat qiladi. Majlisda qonun loyihasi deputatlar tomonidan qabul qilingan.
Aprel oyining oxirlarida Hisob palatasi davlat idoralari tomonidan o‘z rasmiy veb-saytlariga budjet jarayonining ochiqligini taʼminlaydigan axborotning joylashtirilishi bo‘yicha 2022-yil xulosalarini taqdim etgandi. Ma’lum qilinishicha, 2022-yil II chorak yakunlari bo‘yicha ushbu yo‘nalishdagi ishlar holati respublikaning 208 ta tuman va shahar hokimliklari kesimida o‘rganilgan. Natijada 44 ta hokimlik maʼlumotlarni to‘liq joylashtirgani, 5 tasi – to‘liq joylashtirmagani va 159 tasi – umuman joylashtirmagani aniqlangan.
Izoh (0)