Hisob palatasi davlat idoralari tomonidan o‘z rasmiy veb-saytlariga budjet jarayonining ochiqligini taʼminlaydigan axborotning joylashtirilishi bo‘yicha 2022-yil xulosalarini taqdim etdi. Maʼlum qilinishicha, 2022-yil II chorak yakunlari bo‘yicha ushbu yo‘nalishdagi ishlar holati respublikaning 208 ta tuman va shahar hokimliklari kesimida o‘rganilgan. Natijada 44 ta hokimlik maʼlumotlarni to‘liq joylashtirgani, 5 tasi – to‘liq joylashtirmagani va 159 tasi – umuman joylashtirmagani aniqlangan. Qashqadaryo viloyatining Dehqonobod tumani hokimligi axborot xizmati masʼullaridan biri Qashqadaryodagi mavjud tuman va shahar hokimliklarining barchasi byudjet jarayonining ochiqligini taʼminlay olmagan hokimliklar sifatida eʼtirof etilganini, buning o‘ziga xos sababi borligini ochiqladi.
“Qashqadaryo viloyati hokimligi huzurida ‘Axborot-kommunikatsiya texnologiyalarini rivojlantirish markazi’ DUK tashkiloti bor. Nomi jarangdor, viloyat hokimligi huzurida. Shu nom ostida ular barcha qing‘irliklarini amalga oshirib, tuman va shahar hokimliklarining axborot siyosatiga masʼullarini aldab, ‘qulog‘iga lag‘mon ilib kelmoqda‘. Muammo ne dersiz. Gap shundaki, o‘z vaqtida ‘shaxsan viloyat hokimi topshirig‘i bilan’, deya tuman hokimliklarining saytini yaratish uchun kamida har bir tuman va shahar hokimliklaridan 7 million so‘mdan majburiy-ixtiyoriy tarzda shartnoma qildirib, pulini qurtdek sanab olgan tashkilot sayt yaratish ishlarida majburiyatini to‘liq bajarmagan”, — deyiladi hokimlik vakilining bu haqdagi chiqishida.
Ta’kidlanishicha, Qashqadaryodagi mavjud tuman va shahar hokimliklarining aksariyatida shu muammo mavjud.
“Boisi, aksariyat hokimliklar saytini viloyat hokimligi huzuridagi o‘sha monopol tashkilot — kompyuterlashtirish markazi qilgani sabab, ochiq maʼlumotlar bo‘limi yaratilmagan. Yaratilganlarida ham sayt ‘adminkasi’da ochiq maʼlumotlarni joylash imkoniyati yo‘q. Dasturlash ishlari yakunlanmagan. Lekin tashkilot sayt yaratish ishlari uchun tuman va shahar hokimliklaridan pulini allaqachon olib bo‘lgan. Muammo yuzasidan shaxsan o‘zim, Dehqonobod tumani hokimligi axborot xizmati vakili sifatida tashkilot rahbari Ravshan Jonmurodovga lof bo‘lsa-da, yuzlab telefon qilib, iltimos qilganman. (Aslida shartnomaga ko‘ra, bu ularning majburiyati) Ammo Ravshan aka har doim ‘Xo‘p, Abbosga aytaman, bugun qilib beradi, ertaga qilib beradi’, deya davomli yolg‘onlar bilan qo‘ynimizni puch yong‘oqqa to‘ldirib kelmoqda.
Tuman Moliya bo‘limi har chorak yakunida hokimlikning rasmiy saytiga joylanishi kerak bo‘lgan maʼlumotlarni taqdim etadi. Ammo uni saytga joylash uchun hokimlik axborot xizmati vakillarida imkoniyat yo‘q. Sayt adminkasida bunaqa imkoniyat yaratilmagan. Ochiq axborotlar o‘z vaqtida joylashtirilmagach esa, hokimlik axborot xizmati ishlamayapti degan xulosaga kelinadi. Aslida bu holat bokschini ringga chiqarib, raqibiga qarshi qo‘lqopsiz jang qildirish, askarni jang maydoniga yuborib, qo‘liga qurol bermaslikdek gap. Xo‘sh, viloyat hokimligi huzuridagi tashkilot shunaqa o‘yin qilgach, tuman va shahar hokimliklari axborot xizmatlari kimga shikoyat qilsin? Bu tashkilotning ishini so‘raydigan, uning majburiyatlarini o‘z vaqtida bajarishga chaqiradigan ega bormi? Yoki tashkilot rahbari shaxsan viloyat hokimi topshirig‘i bilan deya, ko‘pchilikni aldab yuraveradimi?”, — deyiladi bu haqdagi maqolada.
Izoh (0)