Oliy Majlis Qonunchilik palatasi va Senatining qo‘shma majlisida O‘zbekiston saylangan prezidenti Shavkat Mirziyoyev tantanali qasamyod qilib, o‘z lavozimiga kirishdi.
Tantanali marosimni avvalida Markaziy saylov komissiyasi raisi Zayniddin Nizomxo‘jayev so‘zga chiqib, Shavkat Mirziyoyevga prezidentlik guvohnomasini topshirdi. Ayni paytda davlat rahbari nutq so‘zlamoqda.
“Menga yuksak ishonch bildirib, O‘zbekiston prezidenti etib saylagan barcha yurtdoshlarimga yana bir bor chin qalbimdan samimiy minnatdorchilik bildiraman. Muqaddas Vatanimiz timsoli va mustaqilligimiz ramzi bo‘lgan O‘zbekiston Respublikasi davlat bayrog‘iga, madhiyamiz va gerbimizga, menga topshirilgan Prezidentlik Oliy nishoni va bayrog‘iga yuksak hurmat bajo keltiraman.
O‘zbekiston Respublikasi Prezidenti lavozimiga saylanishimni men inson huquq va erkinliklarini, xalq manfaatini taʼminlashga qaratilgan siyosatimizning yana bir yuksak eʼtirofi sifatida qabul qilaman”, – dedi prezident.
9-iyul kuni bo‘lib o‘tgan prezident saylovi natijalariga ko‘ra Shavkat Mirziyoyev 87,05 foiz ovoz olib, g‘olib bo‘lgandi. Robaxon Mahmudova 4,43 foiz, Ulug‘bek Inoyatov 4,02 foiz, Abdushukur Hamzayev 3,74 foiz ovoz olgandi.
Shavkat Mirziyoyevning prezidentlik faoliyati
Shavkat Mirziyoyev 2016-yil 4-dekabr kuni bo‘lib o‘tgan Prezident saylovi yakunlari bo‘yicha saylovchilarning 88,61 foiz ovozi bilan O‘zbekiston prezidenti etib saylangan. 2021-yil 24-oktabr kuni bo‘lib o‘tgan prezident saylovida 80,1 foiz ovoz bilan O‘zbekiston prezidenti etib qayta saylangan. 6-noyabr kuni Oliy Majlis Senati binosida inauguratsiya marosimi bo‘lib o‘tgan.
Majlisni Markaziy saylov komissiyasi raisi Zayniddin Nizomxo‘jayev ochib berib, Shavkat Mirziyoyevga prezident guvohnomasi va MSK shahodatnomasini topshirgan. Shundan so‘ng Shavkat Mirziyoyev O‘zbekiston Konstitutsiyasi va Qur’oni Karimga qo‘l qo‘ygan holda qasamyod qilgan va yig‘ilganlar qarshisida nutq so‘zlagan.
Izoh (0)