2024-yil noyabr oyida Qashqadaryo viloyatining 100 yilligi nishonlanadi. Vazirlar Mahkamasi yubileyni nishonlashga tayyorgarlik ko‘rish va uni o‘tkazish to‘g‘risidagi qaror loyihasini jamoatchilik muhokamasiga qo‘ydi.
Normativ-huquqiy hujjatlar muhokamasi portalida yozilishicha, Vazirlar Mahkamasi Qashqadaryo viloyati hokimi, viloyat faollari, ijodkor ziyolilar hamda jamoat tashkilotlari vakillarining Qashqadaryo viloyatining 100 yillik yubileyini 2024-yil noyabr oyida Qarshi shahrida keng nishonlash haqidagi takliflarini ma’qullagan.
Loyihada keltirilishicha, bayramni o‘tkazish bo‘yicha respublika tashkiliy ishchi guruhi tuziladi va:
- viloyatning 100 yillik yubiley tadbirlarini yuksak saviyada va tashkilotchilik ruhida o‘tkazish ta’minlanadi;
- Qarshi, Shahrisabz shaharlari va tumanlarda bunyod etilgan binolarni ta’mirlash, atroflarini obodonlashtirish, ularni zamonaviy yoritish jihozlari bilan ta’minlash ishlari amalga oshiriladi;
- viloyatning ijtimoiy-iqtisodiy rivojlanishiga hissa qo‘shgan va faol ishtirok etgan hamda samarali xizmat qilgan keksa va yosh xodimlar respublika faxriy unvonlariga va faxriy yorliqlariga tavsiya etiladi.
Shuningdek, Qashqadaryo viloyatining 100 yilligini nishonlashga tayyorgarlik ko‘rish va uni o‘tkazish tadbirlari dasturi ishlab chiqilgan bo‘lib, uning doirasida tantanali bayram tadbiri o‘tkazish, teatrlashtirilgan bayram dasturi tayyorlash, “Qashqadaryo viloyatining ilmiy va innovatsion salohiyati” xalqaro ilmiy anjumanini o‘tkazish kabilar mavjud.
Bundan tashqari, UNESCO ishlari bo‘yicha O‘zbekiston Respublikasi milliy komissiyasi va xalqaro tashkilotlar ishtirokida “Qashqadaryoning jahon sivilizatsiyasi taraqqiyotida tutgan o‘rni” mavzusida xalqaro ilmiy konferensiya tashkil etiladi. Viloyatning 100 yillik yubileyiga bag‘ishlab baxshi-shoirlarning “Dostonlarda yurt madhi” viloyat ko‘rik-tanlovi o‘tkaziladi.
Nashr ishlari jarayonida:
- Qashqadaryoning 100 yilligiga bag‘ishlab pochta markalari, xatjildlar chiqariladi;
- “Qashqadaryo 100 yil ichida” nomli rasmli bukletlar tayyorlanadi;
- Qashqadaryolik mashhur insonlar hayoti aks ettirilgan “Qashqadaryo iftixori” kitobi nashr qilinadi;
- Viloyatning tabiiy majmualari va bioxilma-xilligini jamoatchilikka tanishtirish maqsadida videofilm suratga olinadi hamda ensiklopedik kitob tayyorlanadi va chop etiladi;
- Qashqadaryo viloyatining 100 yilligi ramzi (logotipi) tayyorlanadi;
- Qashqadaryo viloyatining 100 yilligi yubiley esdalik tangasi chiqariladi;
- Viloyat tarixiga bag‘ishlangan “Asr oshgan Qashqadaryo” hujjatli filmi yaratiladi.
Izoh (0)