So‘nggi yetti yil ichida ilk bor dunyoda ochlikdan aziyat chekayotganlar soni yildan yilga ko‘paymadi. Shunga qaramay, Afrika, G‘arbiy Osiyo va Karib havzasidagi ayrim hududlarning ko‘rsatkichlari yomonlashgan. Bu haqda Birlashgan Millatlar Tashkiloti qoshidagi besh agentlikning 12-iyul kuni Jenevada taqdim etilgan “Dunyoda oziq-ovqat xavfsizligi va oziqlanish darajasi” (The State of Food Security and Nutrition in the World) nomli hisobotida aytilgan.
Ushbu hujjatga ko‘ra, 2022-yilda dunyoda och qolganlar soni qariyb 735 million kishini tashkil etgan, bu avvalgi yildan 3,8 million kishiga kamdir. Biroq Afrika, G‘arbiy Osiyo va Karib havzasida ochlik muammosi og‘irlashayotganiga ishora qilgan BMT ekspertlari “mamnun bo‘lishga hech qanday sabab yo‘q” deb ogohlantirdi.
Mutaxassislarning hisob-kitoblariga ko‘ra, 2022-yilda 2,4 milliard odam yoki dunyo aholisining 29,6 foizi oziq-ovqat mahsulotlaridan barqaror foydalanish imkoniyatiga ega bo‘lmagan. Ularning fikricha, agar bu tendensiya davom etsa, 2030-yilgacha sayyorada ocharchilikka barham berish maqsadiga erishib bo‘lmaydi. BMT vaziyatning salbiy rivojlanishiga koronavirus pandemiyasi, davriy tabiiy ofatlar, shuningdek, Ukrainadagi urush kabi qurolli mojarolarni sabab deb hisoblaydi.
Eng yomon ahvol Afrikada. Hisobotga ko‘ra, u yerda har beshinchi odam ochlikka duch kelmoqda. Bu ko‘rsatkich jahon o‘rtacha ko‘rsatkichidan ikki barobar yuqori. Ayni paytda, Osiyo va Lotin Amerikasida mutaxassislar ayrim yaxshilanishlarni qayd etdi.
Shu bilan birga, 2022-yilda dunyoda 5 yoshgacha bo‘lgan 148 million bola to‘yib ovqatlanmaslik tufayli rivojlanish nuqsonlaridan aziyat chekkan, 37 million bola esa ortiqcha vaznga duch kelgan.
Izoh (0)