AQSH besh yillik tanaffusdan so‘ng Birlashgan Millatlar Tashkilotining Ta’lim, fan va madaniyat masalalari bo‘yicha tashkiloti (UNESCO)ga rasman qaytdi. Bu haqda 11-iyul kuni UNESCO bosh direktori Odri Azule ma’lum qildi, deb xabar bermoqda xalqaro tashkilot matbuot xizmati.
“AQSHning UNESCO’ga qaytish jarayoni yakunlandi. U rasman yana tashkilotimizga a’zo davlatga aylandi. Bu UNESCO uchun ajoyib yangilik. Bizning tashabbuslarimiz butun dunyoda kuchayadi”, — dedi Azule.
AQSH tashkilotga qaytganidan keyin uning 194-a’zosi bo‘ldi.
Qayd etilishicha, tashkilotga qaytishdan avval AQSH va BMT qo‘shma harakatlar rejasini tuzgan. Amerika bayrog‘ini tashkilotda ko‘tarish marosimi iyul oyining oxirida bo‘lib o‘tadi.
BMTning Ta’lim, fan va madaniyat masalalari bo‘yicha tashkiloti UNESCO — BMTning ixtisoslashgan muassasasi. U taʼlim, fan va madaniyat sohasida xalqaro hamkorlikni kengaytirish orqali tinchlik va xavfsizlikni mustahkamlash maqsadida tashkil etilgan.
AQSH UNESCO’dan nega chiqqandi?
AQSH 2017-yil oktabr oyida UNESCO’dan chiqib ketgandi. Mamlakatning 45-prezidenti Donald Tramp ma’muriyati bu qarorni tashkilotning Isroilga qarshi siyosati bilan bog‘ladi. Oradan ko‘p o‘tmay Isroil ham tashkilotdan chiqdi.
Isroil hukumati 2022-yil fevral oyida AQSH Davlat departamentini Amerikaning UNESCO’ga qaytishiga qarshi emasligi haqida xabardor qilgan. Dekabr oyida Kongress AQSHning UNESCO oldidagi qarzini to‘lash uchun 500 million dollardan ortiq mablag‘ ajratuvchi qonun loyihasini maʼqulladi, bu esa mamlakatga yana tashkilotga aʼzo bo‘lish imkonini berdi.
UNESCO tarixida AQSH delegatsiyasi tashkilotni ikki marta tark etgan, birinchi tanaffus 18 yil — 1985-yildan 2003-yilgacha davom etgan. Amerikadagi o‘ndan ortiq obyektlar UNESCO’ning Jahon merosi obyektlari sifatida tan olingan.
Izoh (0)