AQSH Birlashgan Millatlar Tashkilotining ta’lim, fan va madaniyat bo‘yicha tashkiloti — UNESCO’ni tashkilotga qayta qo‘shilmoqchiligi haqida xabardor qildi. Bu haqda Axios AQSH davlat departamenti vakiliga tayanib yozmoqda.
AQSH 2017-yil oktabr oyida UNESCO’dan chiqib ketgandi. Mamlakatning 45-prezidenti Donald Tramp ma’muriyati bu qarorni tashkilotning Isroilga qarshi siyosati bilan bog‘ladi. Oradan ko‘p o‘tmay Isroil ham tashkilotdan chiqdi.
Isroil hukumati 2022-yil fevral oyida AQSH Davlat departamentini Amerikaning UNESCO’ga qaytishiga qarshi emasligi haqida xabardor qilgan. Dekabr oyida Kongress AQSHning UNESCO oldidagi qarzini to‘lash uchun 500 million dollardan ortiq mablag‘ ajratuvchi qonun loyihasini maʼqulladi, bu esa mamlakatga yana tashkilotga aʼzo bo‘lish imkonini berdi.
UNESCO tarixida AQSH delegatsiyasi tashkilotni ikki marta tark etgan, birinchi tanaffus 18 yil — 1985-yildan 2003-yilgacha davom etgan. Amerikadagi o‘ndan ortiq obyektlar UNESCO’ning Jahon merosi obyektlari sifatida tan olingan.
Izoh (0)