АҚШ беш йиллик танаффусдан сўнг Бирлашган Миллатлар Ташкилотининг Таълим, фан ва маданият масалалари бўйича ташкилоти (UNESCО)га расман қайтди. Бу ҳақда 11 июль куни UNESCО бош директори Одри Азуле маълум қилди, деб хабар бермоқда халқаро ташкилот матбуот хизмати.
“АҚШнинг UNESCO’га қайтиш жараёни якунланди. У расман яна ташкилотимизга аъзо давлатга айланди. Бу UNESCО учун ажойиб янгилик. Бизнинг ташаббусларимиз бутун дунёда кучаяди”, — деди Азуле.
АҚШ ташкилотга қайтганидан кейин унинг 194-аъзоси бўлди.
Қайд этилишича, ташкилотга қайтишдан аввал АҚШ ва БМТ қўшма ҳаракатлар режасини тузган. Америка байроғини ташкилотда кўтариш маросими июль ойининг охирида бўлиб ўтади.
БМТнинг Таълим, фан ва маданият масалалари бўйича ташкилоти UNESCО — БМТнинг ихтисослашган муассасаси. У таълим, фан ва маданият соҳасида халқаро ҳамкорликни кенгайтириш орқали тинчлик ва хавфсизликни мустаҳкамлаш мақсадида ташкил этилган.
АҚШ UNESCO’дан нега чиққанди?
АҚШ 2017 йил октябрь ойида UNESCO’дан чиқиб кетганди. Мамлакатнинг 45-президенти Дональд Трамп маъмурияти бу қарорни ташкилотнинг Исроилга қарши сиёсати билан боғлади. Орадан кўп ўтмай Исроил ҳам ташкилотдан чиқди.
Исроил ҳукумати 2022 йил февраль ойида АҚШ Давлат департаментини Американинг UNESCO’га қайтишига қарши эмаслиги ҳақида хабардор қилган. Декабрь ойида Конгресс АҚШнинг UNESCО олдидаги қарзини тўлаш учун 500 миллион доллардан ортиқ маблағ ажратувчи қонун лойиҳасини маъқуллади, бу эса мамлакатга яна ташкилотга аъзо бўлиш имконини берди.
UNESCО тарихида АҚШ делегацияси ташкилотни икки марта тарк этган, биринчи танаффус 18 йил — 1985 йилдан 2003 йилгача давом этган. Америкадаги ўндан ортиқ объектлар UNESCO’нинг Жаҳон мероси объектлари сифатида тан олинган.
Изоҳ (0)