O‘zbekistonning Jidda shahridagi Bosh konsulligida saudiyalik tadbirkor Bassam al-Saadi bilan muzokaralar tashkil etildi, deb xabar beradi “Dunyo” agentligi.
Qayd etilishicha, uchrashuv chog‘ida O‘zbekiston sayyohlik infratuzilmasini rivojlantirishga xorijiy investitsiyalarni jalb etish masalalari muhokama qilingan. Saudiya Arabistoni vakiliga O‘zbekistonda amalga oshirilayotgan keng ko‘lamli o‘zgarishlar, iqtisodiyotni liberallashtirish va tashqi savdoni rivojlantirish bo‘yicha islohotlar, xorijiy investorlar uchun yaratilgan biznes-qulayliklar haqida batafsil maʼlumot berilgan.
Bassam al-Saadi o‘z navbatida, O‘zbekiston Bosh konsulxonasi ko‘magida mamlakatdagi biznesini yanada kengaytirish va mustahkamlashga harakat qilayotganini bildirgan.
“Biz hamkorlarimiz bilan Farg‘ona shahrida turistik dam olish maskanini barpo etish loyihasi uchun 3 million dollar miqdoridagi mablag‘ni kiritishni rejalashtiryapmiz. Ushbu dam olish maskani loyihasida 5 ta katta villa, 9 dona o‘rta va 15 ta kichik villalar hamda savdo markazi va bolalar o‘yingohi qurilishi nazarda tutilmoqda”, — deydi u.
Uchrashuv natijasida saudiyalik tadbirkor bilan O‘zbekistondagi boshqa loyihalarga ham investitsiya kiritish imkoniyatlarini o‘rganish bo‘yicha kelishib olingan.
Bundan oldin Toshkent viloyati Bo‘stonliq tumanidagi “Anhor sayli” (sobiq “Aziz” va “Kazbek”) dam olish oromgohlari kimoshdi savdosida sotilgani to‘g‘risida xabar berilgandi. Mart oyida esa Milliy bankning dam olish maskani qariyb 80 milliard so‘mga sotilgan, iyul boshida bo‘lsa, “Sijjak” va “Chotqol” dam olish maskanlari xususiylashtiriladigan obyektlar ro‘yxatidan chiqarilgan edi.
Izoh (0)