“Oxirgi yillarda o‘qish uchun xorijga ketayotgan yoshlarimiz soni kamaymoqda” — Komiljon Karimov

O‘zbekistonda oliy taʼlim muassasalari (OTM) ko‘paygani sari chet elga borib, o‘qiyotgan yoshlar soni kamaymoqda. Bu haqda oliy taʼlim, fan va innovatsiyalar vazirining birinchi o‘rinbosari Komiljon Karimov “Markaziy Osiyo oliy taʼlim xabi(markaz) sifatida” xalqaro anjumani doirasida “Daryo” nashriga bergan intervyusida maʼlum qildi.

Komiljon Karimovning aytishicha, dunyoda oliy taʼlim xablarining turli modellari mavjud.

“Davlatlar xab yaratishda oldiga aniq bir maqsad qo‘ygan. Ayrimlari o‘zida milliy salohiyatni xalqaro hamkorlik orqali rivojlantirishga urinadi. Masalan, Malayziya huddi shunday. Dubayda esa ko‘proq xorijdan talabalarni jalb qilishga eʼtibor beriladi. Chunki u yerda aholi kam, 90 foiz aholisi xorijdan kelgan. Shuning uchun ularning maqsadi xorijdan iqtidorli yoshlarni taʼlimga jalb qilishdan iborat. Bizga Malayziya xabi yaqinroq. Bugungi kunda respublikamizda 30 dan ortiq xorijiy OTMlar o‘z filialini ochgan. Xorijiy ekspertlar O‘zbekistonning mazkur jihatini eʼtirof etishyapti, o‘rganish uchun juda muhim deyishyapti”, — dedi vazir o‘rinbosari.

Komiljon Karimov suhbat davomida xorijda necha nafar o‘zbekistonlik yoshlar o‘qiyotganini hisob-kitob qilish qiyin masala ekanini aytdi.

“Afsuski, xorijga chiqayotgan yoshlar qaysi o‘qishga ketayotgani bo‘yicha statistika olib borilmaydi. Lekin taxminlarimiz bor. Hozirda xorijda o‘qiyotgan fuqarolarimizning katta qismi Markaziy Osiyo davlatlaridagi OTMlarda tahsil olyapti. Aksariyat talabalar Qozog‘iston, Qirg‘iziston va Rossiyada o‘qiyapti”, — dedi u.

Vazir o‘rinbosariga ko‘ra, oxirgi yillarda O‘zbekistondagi OTMlar soni ko‘paygani sari chetga chiqib o‘quvchilar soni kamaymoqda.

“Chunki o‘zimizda imkoniyat yaratilmoqda. Xususiy oliy taʼlim muassasalari ochilyapti. Ularning soni hozir 65 taga yetdi. Xususiy OTMlarda 125 ming nafardan ortiq talabalar tahsil olyapti. Bu katta son”, — dedi Komiljon Karimov.

Oliy taʼlim, fan va innovatsiyalar vazirligi bergan maʼlumotga ko‘ra, O‘zbekistonda so‘nggi besh yil ichida 100 dan ortiq yangi universitetlar ochilgan. Mamlakatda hozir jami 210 ta OTM faoliyat yuritmoqda.