Telegram'da Iqtisodiyot va moliya vaziri Sherzod Kudbiyevdan tashkilot binosini qo‘l chizmalari bilan bezatish uchun 303 million so‘m sarflash uchun ruxsat so‘ralgan hujjat rasmi tarqaldi.
Foto: “Daryo”
Xatda bino ko‘rkini oshirish uchun taklif etilayotgan pullar vazirlikning budjetdan tashqari mablag‘lari hisobidan moliyalashtirilishi so‘ralgan.
“Maʼlumki, vazirligimizga xorijdan ko‘plab hukumat doirasidagi rasmiy delegatsiyalar hamda yurtimizga kelayotgan chet el investorlarining tashrif buyurishi tabiiy holga aylangan. Mehmonlarni kutib olish chog‘ida ularga yurtimiz haqida ijobiy tasavvurini shakllantirish, shu bilan birga, vazirlik binosining ko‘rkini ochish maqsadida binoning kirish qismini respublikamizning taniqli rassomi I.Otaboyevning yurtimizning so‘lim manzaralari tasvirlangan turkum asarlar to‘plami bilan bezatish taklif etilmoqda. Yuqoridagilarni inobatga olib, taklif etilayotgan 303 million so‘m (hisob-kitoblar ilova qilinadi) xarajatlarni vazirlikning budjetdan tashkari mablag‘lari hisobidan amalga oshirilishiga ruxsat berishingizni so‘raymiz”, — deb yozilgan xatda.
Ishlar boshqarmasi boshlig‘i D.Bulanov imzolagan matn ostida 2018-yil 27-sentabrdagi 3953-sonli prezident qarorining 36-bandiga asosan, sanʼat asarlarini xarid qilish uchun to‘g‘ridan to‘g‘ri shartnoma tuzish ko‘zda tutilgani yozilgan.
Avvalroq mazkur vazirlik departament direktori Sherzod Muhamedov “Daryo” muxbiri bilan suhbatda davlat budjeti taqchillik bilan ijro etilayotganini izohlagandi.
“Budjet taqchilligi rivojlanayotgan davlatlar rivojlanishlari uchun tabiiy holat deb baholanadi. Bu bo‘yicha xalqaro valyuta jamg‘armasi bilan ham ishlaganmiz. Joriy yildan boshlab davlat budjeti taqchilligi yalpi ichki mahsulotning 3 foizidan oshmasligi kerak, degan chegara o‘rnatildi”, — degan u.
Sherzod Muhamedov fikriga qo‘shimcha tarzda defitsit bo‘lishiga qaramay budjet xarajatlari kamaytirilmasligini maʼlum qilgan.
“Davlat budjeti xarajatlari kamaytirilishi bo‘yicha aniq rejalar mavjud emas. To‘g‘ri, ayrim xarajatlar muhimligidan kelib chiqib bir yo‘nalishdan boshqasiga o‘tkazilishi mumkin. Lekin davlat budjetini kamaytirish bo‘yicha choralar ko‘zda tutilmagan”, — degan vazirlik vakili.
Izoh (0)