Ўзбекистон мусулмонлари идораси раиси, муфтий Нуриддин Холиқназаров ҳазратлари ҳам овоз бериш жараёнида қатнашди. Бу ҳақда “Дарё” мухбири хабар бермоқда.
.jpg)
Фото: “Дарё” / Мадина Нурман
Бугун, 9 июль — Ўзбекистонда президентлик сайлови куни. Эрталаб соат 08:00 да аҳоли президентликка номзодларга овоз беришни бошлади. Муфтий ҳазратлари ҳам ўзи ёқлаган номзодга овоз берди.
.jpg)
“Аллоҳга шукр, бугун шундай тарихий бир воқеада иштирок этишни насиб этди. Ихтиёримиздаги сайлов участкасига келиб, ўзимизнинг фуқаролик бурчимиз ўлароқ овоз бериб чиқдик. Ўзимиз ёқлаган, ўзимиз одил деб билган номзодга овоз бердик. Ҳар бир мўмин-мусулмон банда бефарқ бўлмаслиги, ва масъулият билан яшамоғи лозим. Аллоҳдан умид қиламизки, бугун биз танлаган номзод юртимиз ободлиги, ватанимиз тараққиёти ва ёшларимиз бахт-у саодати учун хизмат қилади”, — деди Ўзбекистон мусулмонлари идораси раиси.
.jpg)
Аввалроқ Ўзбекистонда президентлик сайлови бошлангани хабар қилинганди.
Маълумот учун, тўрт нафар номзод президентлик учун курашмоқда. Улар — Халқ демократик партиясидан Улуғбек Иноятов, ЎзЛиДеПдан Шавкат Мирзиёев, “Адолат” партиясидан Робахон Маҳмудова ҳамда Экопартиядан Абдушукур Ҳамзаев.
Сайловда ғолиб бўлган номзод президентликка 7 йилга сайланади. Бу ҳақда янгиланган Конституцияда белгилаб қўйилган.
Марказий сайлов комиссияси ахборотига кўра, 2023 йил 1 июль ҳолатига жами 376 минг 623 нафар сайловчилар муддатидан олдин овоз бериш ҳуқуқидан фойдаланган. Шундан республика ҳудудида — 275 минг 592 нафар, хорижда — 101 минг 31 нафар сайловчи овоз берган.
Изоҳ (0)