Akmal Burhonov qaynotasi 1,5 mln dollarlik uy sovg‘a qilgani haqidagi mish-mishni rad etdi

Ijtimoiy tarmoqda Aksilkorrupsiya agentligi rahbari Akmal Burhonovga qaynotasi 1,5 mln dollarga uy sovg‘a qilgani haqidagi xabar tarqaldi. Agentlik rahbari bu mish-mishlar yolg‘onligini maʼlum qildi.

Telegram‘dagi kanallardan birida tarqatilgan xabarda Akmal Burhonovga qaynotasi 1,5 million dollarlik dang‘illama hovli sovg‘a qilgani, uyning yerosti va usti qismi ikki qavatdan ekani, hovlida lift o‘rnatilgani va uch nafar xizmatkor borligi iddao qilingan.

Korrupsiyaga qarshi kurashish agentligi direktori Akmal Burhonov bu xabarni yolg‘on deb atadi.

“Bu yolg‘on xabar! Shunday bo‘lsa-da, qaynotamga yuborib qo‘ydim”, — deya holatga munosabat bildirgan Burhonov Twitter‘dagi sahifasida.

Aprel oyida Korrupsiyaga qarshi kurashish agentligi agentlik rahbariyati tomonidan olingan sovg‘alar reyestrini eʼlon qilgandi. Unga ko‘ra, shu vaqtgacha qiymati 14 million 570 ming so‘mlik 8 ta sovg‘a agentlikka hadya qilingan. Ularning barchasini tashkilot direktori Akmal Burhonov qabul qilgan.