Telegram'да Иқтисодиёт ва молия вазири Шерзод Кудбиевдан ташкилот биносини қўл чизмалари билан безатиш учун 303 миллион сўм сарфлаш учун рухсат сўралган ҳужжат расми тарқалди.
Фото: “Дарё”
Хатда бино кўркини ошириш учун таклиф этилаётган пуллар вазирликнинг бюджетдан ташқари маблағлари ҳисобидан молиялаштирилиши сўралган.
“Маълумки, вазирлигимизга хориждан кўплаб ҳукумат доирасидаги расмий делегациялар ҳамда юртимизга келаётган чет эл инвесторларининг ташриф буюриши табиий ҳолга айланган. Меҳмонларни кутиб олиш чоғида уларга юртимиз ҳақида ижобий тасаввурини шакллантириш, шу билан бирга, вазирлик биносининг кўркини очиш мақсадида бинонинг кириш қисмини республикамизнинг таниқли рассоми И.Отабоевнинг юртимизнинг сўлим манзаралари тасвирланган туркум асарлар тўплами билан безатиш таклиф этилмоқда. Юқоридагиларни инобатга олиб, таклиф этилаётган 303 миллион сўм (ҳисоб-китоблар илова қилинади) харажатларни вазирликнинг бюджетдан ташкари маблағлари ҳисобидан амалга оширилишига рухсат беришингизни сўраймиз”, — деб ёзилган хатда.
Ишлар бошқармаси бошлиғи Д.Буланов имзолаган матн остида 2018 йил 27 сентябрдаги 3953-сонли президент қарорининг 36-бандига асосан, санъат асарларини харид қилиш учун тўғридан тўғри шартнома тузиш кўзда тутилгани ёзилган.
Аввалроқ мазкур вазирлик департамент директори Шерзод Муҳамедов “Дарё” мухбири билан суҳбатда давлат бюджети тақчиллик билан ижро этилаётганини изоҳлаганди.
“Бюджет тақчиллиги ривожланаётган давлатлар ривожланишлари учун табиий ҳолат деб баҳоланади. Бу бўйича халқаро валюта жамғармаси билан ҳам ишлаганмиз. Жорий йилдан бошлаб давлат бюджети тақчиллиги ялпи ички маҳсулотнинг 3 фоизидан ошмаслиги керак, деган чегара ўрнатилди”, — деган у.
Шерзод Муҳамедов фикрига қўшимча тарзда дефицит бўлишига қарамай бюджет харажатлари камайтирилмаслигини маълум қилган.
“Давлат бюджети харажатлари камайтирилиши бўйича аниқ режалар мавжуд эмас. Тўғри, айрим харажатлар муҳимлигидан келиб чиқиб бир йўналишдан бошқасига ўтказилиши мумкин. Лекин давлат бюджетини камайтириш бўйича чоралар кўзда тутилмаган”, — деган вазирлик вакили.
Изоҳ (0)