Xitoydan Yevropaga yuk tashish hajmi oshgani bois Xitoy—Markaziy Osiyo—Kavkaz—Yevropa yo‘nalishida yuk tashishni tashkil etish bo‘yicha faol ishlar olib borilmoqda. Bu haqda O‘zbekiston transport vaziri Ilhom Mahkamov “Sheriklik tashabbuslari haftaligi” doirasida o‘tkazilayotgn panel sessiyada ma’lum qildi.
“Biz Xitoy—Qirg‘iziston—O‘zbekiston temiryo‘li qurilishi loyihasi amalga oshirilishi boshlanishini muhim voqea deb bilamiz. Temiryo‘l qurilishi natijasida mintaqa Sharqiy Osiyo va Yevropa o‘rtasidagi asosiy tranzit markazlaridan biriga aylanishi, Fors ko‘rfazi va Tinch okeani portlariga eng qisqa yo‘l bilan kirishni taʼminlash orqali savdo-iqtisodiy va tranzit salohiyatni oshirish, Sharqiy Osiyodan Yaqin Sharq va Janubiy Yevropa mamlakatlariga 900 kilometrgacha yo‘lni qisqartirish, shuningdek, yuklarni yetkazib berish muddatini 7-8 kunga kamaytirish imkoniyati yaratiladi”, — deydi Mahkamov.
Transport vazirining qayd etilishicha, O‘zbekiston, Qirg‘iziston va Xitoy qurilish loyihasining yangi bosqichini boshlagan.
“Ishonchim komilki, ushbu yirik infratuzilma loyihalarini amalga oshirish mintaqaviy sheriklikni mustahkamlash va Markaziy Osiyo mamlakatlari hududi bo‘ylab yuk tashish hajmini oshirishga turtki bo‘ladi”, — deya ta’kidlaydi u.
Qirg‘iziston transport va kommunikatsiyalar vaziri Tilek Tekebayevning so‘zlariga ko‘ra, transport-infratuzilmaviy kommunikatsiyalarni takomillashtirish va Markaziy Osiyoga xalqaro tranzit yuk tashuvchilarini jalb etish mintaqa davlatlarini birlashtiruvchi eng muhim yo‘nalishlardan biridir.
“Shu maʼnoda Xitoy—Qirg‘iziston—O‘zbekiston temiryo‘li qurilishi loyihasining amalga oshirilishi Markaziy Osiyoni butun bir logistika xabiga, yaʼni jahonning muhim bozoriga aylantirishga hissa qo‘shishi bilan ahamiyatlidir”, — deydi u.
Xitoy—Qirg‘iziston–—O‘zbekiston temiryo‘li qurilishi loyihasi bo‘yicha 2022-yil sentabr oyida Samarqandda bo‘lib o‘tgan SHHT sammiti doirasida uch davlat vakillari tomonidan kelishilgan edi. 2023-yilning 29-aprelida temiryo‘l loyihasining texnik-iqtisodiy asoslari tayyorligi ma’lum bo‘lgan. 19-mayda esa temiryo‘l qurilishi bo‘yicha uch tomonlama hujjat imzolandi.
Shavkat Mirziyoyev 19-may kuni Sian shahrida bo‘lib o‘tgan Markaziy Osiyo—Xitoy birinchi sammitida “Xitoyni mintaqamiz bilan bog‘laydigan, Yevropa, Yaqin Sharq va Afrikaga olib chiqadigan xavfsiz va eng qisqa transport yo‘laklarini rivojlantirish strategik ahamiyatga ega. Buyuk Ipak yo‘lini qayta tiklashda Trans-Yevrosiyo magistrali loyihasi ustuvor ahamiyatga ega bo‘lib, Xitoy—Qirg‘iziston—O‘zbekiston avtomobil va temiryo‘llari esa uning muhim tarkibiy qismi bo‘ladi”, — deb aytgandi.
Izoh (0)